रामधुनी । रामधुनी ८ मा रहेको सिद्धार्थ शिक्षा सदनले बिहीबार श्रष्टासँग बालबालिका कार्यक्रम सम्पन्न गरेको छ । सञ्चारकर्मी, लेखक तथा सकारात्मक सोचका अभियन्ता राम प्रसाद खरेल मुख्य श्रष्टाको रुपमा रहेको सो कार्यक्रममा विद्यार्थीहरुले आफ्ना प्रतिभा प्रस्फुटन गरेका थिए ।
विद्यार्थीहरुको क्षमता उजागर गर्ने र श्रष्टाको अघि आफ्ना प्रतिभा देखाउनुका साथै श्रष्टाको कुरा सुन्ने उद्देश्यले सो कार्यक्रम आयोजना गरिएको स्कुलका प्रिन्सिपल गोपाल निरौलाले बताए । श्रष्टाका अनुभव, जीवनभोगाई र उत्प्रेरणामुलक भनाईले विद्यार्थी बालबालिका र अभिभावकहरुमा समेत सकारात्मक प्रभाव पर्ने उनको भनाई छ ।
विद्यार्थी बालबालिकाहरुले विभिन्न जातजातीका भाषा तथा भेषभूषासहित नृत्य, करातेँ, नाटकलगायतका प्रतिभा प्रस्फुटन गरेका थिए । कार्यक्रममा चर्चित गायिका गंगा गौतमको समेत सांगितिक प्रस्तुती रहेको थियो । त्यस्तै, विद्यार्थीहरुले तयार गरेका विभिन्न कलात्मक सामाग्री समेत प्रदर्शनमा राखिएको थियो ।
श्रष्टा लेखक तथा सञ्चारकर्मी खरेलले सकारात्मक सोच तथा विद्यार्थी र अभिभावक बीचको सम्बन्धका विषयमा उत्प्रेरक भनाईहरु प्रस्तुत गरेका थिए । 
रामधुनी नगरपालिकाकी उपप्रमुख तारा थापाको प्रमुख आतिथ्यतामा भएको सो कार्यक्रममा श्रष्टाका रुपमा लेखक तथा सञ्चारकमी खरेल, विशेष अतिथिको रुपमा प्याब्सन कोशी प्रदेश समितिका सदस्य उमेश थापा, नगर प्याब्सनका रमेश कार्की, अच्युत भट्टराई, समाजसेवी गंगाराम मण्डल, रामधुनी नगरपालिका वडा नम्बर ८ का वडाध्यक्ष सुरेन्द्र सिंहलगायत रहेका थिए ।
विद्यालयले कार्यक्रमको अवसरमा पत्रकार तथा सञ्चारकर्मी आर.बी.कट्वाललाई सम्मान समेत गरेको छ । एक दशकदेखि पत्रकारितामार्फत समाजलाई सुसूचित गरेको भन्दै कट्वाललाई दोसल्ला र सम्मान पत्रद्वारा सम्मान गरेको हो ।
विद्यार्थीहरुले अतिरिक्त क्षमता तथा प्रतिभा प्रस्फुटन गर्ने उद्देश्यले विद्यालयले १५ वर्षदेखि वार्षिक रुपमा श्रष्टासँग बालबालिका कार्यक्रम गर्दै आइरहेको छ ।
