बराहक्षेत्र । सुनसरीकाे बराहक्षेत्र नगरपालिका वडा ३ विचपानीका किसान मंगलबार बिहान उनीहरुले लगाएको अगुवा धान काट्न हसिँया लिएर जब खेतमा पुगे उनिहरुको होस हवास उड्यो । धानबाली भित्र्याएर गर्जो टार्ने हिसाब छताछुल्ल भयो । खेतमा धानको बोट मात्र देखिन्थ्यो पाकेको बाला यत्रतत्र टुक्रा टुक्रा भएर छरिएको अवस्थामा थियो ।
अहिले धान पाक्ने सिजन सुरु हुने बेला हो । मुठी रोपेर पाथी फलाउन बेलामा धान काट्न नपाउँदै खेतमा फौजी किराको आक्रमणबाट धानको बाला टुक्रा टुक्रा भएको अवस्था देख्नु परेपछि बराहक्षेत्रका किसान चिन्तित हुन पुगेका छन् । बराहक्षेत्र नगरपालिका वडा ३ बिचपानी देखि भित्र शान्ती टोलमा तीर्थबहादुर विश्वकर्मा, यमबहादुर पाण्डे, तिलक श्रेष्ठ, तिलक गजमेर लगायतको धानबाली अहिले धान फौजी किराको प्रकोपले बिनास गरेपछि उनीहरु चिन्तित भएका हुन् ।
‘अगुवा धान काट्न जाँदा धानको बोट मात्र थियो,’ स्थानीय किसान तीर्थबहादुरले भने, ‘बाला सबै टुक्राटुक्रा भएर खेत भरी छरिएको अवस्था थियो ।’ खेतमा लगाएको धानले वर्षभरी हातमुख जोड्ने र घर खर्च व्यहोर्नु पर्ने भरौलका कृषक समूह र सान गजमेर लगायतले बराहक्षेत्र नगरपालिका कृषि शाखामा गएर समस्या राखे ।
कृषि शाखा प्रमुख उपमेयरसहितको टोलीले फौजी किराको प्रकोपले विनाश गरेको धान खेतको अवलोकन समेत गरेको छ । अवलोकनपछि फौजी किराको प्रकोपबाट अरु थप धानबाली बचाउन सल्लाह सुझाव दिनुका साथै कृषि शाखाले केही किटनाशक औषधि समेत प्रदान गरेको छ । कृषि शाखा प्रमुख हरिकुमार खत्रीका अनुसार फौजी किराले दिउँसो धानको गाभामा बस्ने र रात परेपछि निस्कने र धानको बाला काट्ने गर्दछ ।
‘प्रकोप नलाग्नुपथ्र्यो लागी हाल्यो,’ कृषि प्राविधिक निरकुमार राईले भने, ‘अब बाँकी धान बचाउने काम गर्नु जरुरी भएको छ ।’ उनका अनुसार साँझमा फौजी किरा बाहिर आउने भएकाले कृषि शाखाले दिएको औषधि रातको समय लागाउनु पर्ने बताए । फौजी किराको प्रकोपबाट बच्न यो बाहेक अन्य उपाय नदेखिएको समेत उनले बताएका छन् ।
