सुनसरी । बराहक्षेत्र नगरपालिका २ चतरामा कार्तिक २ देखि ९ गतेसम्म चौथो बराह गोल्डकप हुने भएको छ ।
‘स्वास्थ्यका लागि खेलकुद, राष्ट्रका लागि खेलकुद’ भन्ने मूल नाराका साथ बराहक्षेत्र फुटबल क्लबको आयोजनामा गोल्डकप हुन लागेको हो । गोल्डकपको तयारी तीब्र भइरहेको आयोजक क्लबका अध्यक्ष अनिल मगरले जानकारी दिए ।
उक्त गोल्डकपमा चर्च ब्यायज फुटवल क्लब काठमाडौ, एपीएफ काठमाडौं, डाँगिहाट फुटबल क्लब मोरङ, रेडहर्स फुटबल क्लब इलाम, धनकुटा फुटबल क्लब धनकुटा, राष्ट्रिय जागृती फुटबल क्लब इटहरी, एभरेस्ट फुटबल क्लब बराहक्षेत्र ३ (नडाहा) सुनसरी र आयोजक बराहक्षेत्र फुटबल क्लब चतरा गरी आठ फुटबल क्लबको सहभागिता रहने मगरले बताए ।
झापा ११ र फ्रेन्स क्लब काठमाडौंलाई खेल जुधेका कारण यस पटक आउन नसक्ने भएपछि झापाको सट्टा ए.पि.एफ. काठमाडौं र फ्रेन्स क्लबको सट्टा रेड हर्ष क्लब इलाम सहभागी हुने मगरले जानकारी दिए । उक्त प्रतियोगितालाई बराहक्षेत्र नगरपालिकाको कार्यालयले संयोजक गरेको छ भने सहसंयोजक बराहक्षेत्र वडा नम्बर १ र २ रहेको छ ।
उक्त प्रतियोगिता १९ लाख ९७ हजार रुपैयाँ अनुमानित आयब्यय रहेको आयोजकले जनाएको छ । प्रयियोगितामा प्रथम हुने टिमलाई २ लाख १ हजार, द्वितीय हुनेलाई १ लाख १ हजार रुपैयाँ पुरस्कार रहेको छ । आयोजकका अनुसार उत्कृष्ट खेलाडी, सर्वाधिक गोलकर्ता, उत्कृष्ट कोच, उत्कृष्ट गोल किपर, उत्कृष्ट कोच, उत्कृष्ट डिफेन्डर र उत्कृष्ट स्टाइकरले १०÷१० हजार रूपैयाँ नगद प्राप्त गर्ने छन् ।
प्रतियोगिताको सम्पूर्ण खेलहरु आदर्श माविको खेलमैदानमा हुने क्लबका अध्यक्ष मगरले बताए ।
