संगम बिष्ट चतरा
बराहक्षेत्र । गत वर्षको असारमा नै बराहक्षेत्र नगरपालिकाको केन्द्र चक्रघट्टीमा सोलार बत्ति जडान गरी झलमल बनाउने विषय चर्चामा थियो । त्यसको केही समयपछि चक्रघट्टीबाट बांगे बजारमा सोलर बत्ती जडान भयो । स्थानीय पनि खुसी भए ।
चतरा, प्रकाशपुर, भरौलक्षेत्रका जनताले अब अर्कोवर्ष उनीहरुको ठाउँमा पनि नगरपालीकाले सोलर बत्ति राख्ने आशा गरेका थिए । तर यतिबेला थप सोलार बत्ति जडान गर्ने भन्दा पनि चक्रघट्टीदेखि बाङगेसम्म राखिएको पहिलेकै सोलार बत्ति हटाएर अर्कै जडान गर्ने विषयले जनप्रतिनिधिका कुरामा स्थानियले शंका गर्न थालेका छन् । यतिबेला अधिकांश बत्ति काम नलाग्ने अवस्थामा छन् । ति बत्तीहरुबाट प्रकाश आउँदैन । केहीबाट धिपधिप गरि मधुरो प्रकाश आउँछ ।
जडान भयो, उज्यालो भएन
स्थानीयहरुका अनुसार जडान भइसकेका ति सोलारबत्तिले प्रकाश फ्यालेको छैन । ‘नगरपालिकाले घर अगाडि सोलर बत्ती राख्दा ज्यादै खुसी लागेको थियो,’ स्थानीय तुलसी श्रेष्ठले भने, ‘तर बत्ती राखेपछि प्रकाश छैन । नाम मात्रको बत्ति जस्तो छ, उज्यालो छैन ।’ उनले सो सोलार बत्तीहरु प्रकाश बिनाको टुकि जस्तै भएको बताए ।
चक्रघट्टि बसपार्कदेखि महेन्द गेट हुँदै बराहक्षेत्र ७ को बाङ्गेसम्म सोलर बत्ति जडान गरिएको थियो । तर जडान गरिएका बत्तिले जनताका अपेक्षा पूरा गर्न सकेन । नगरले बत्ति जडान गर्ने सप्लायर्सलाई दोष लगाउदै तुरुन्त सोलर बत्ती परिवतन गर्ने भने पनि हालसम्म परिवर्तन हुन सकेको छैन । यता सोलरको बिषयमा बराहक्षेत्र नगरपालिका वडा ६ का अध्यक्ष उद्धब पोखरेल आफै अलमल परेका छन् । नगरपालिकाले लगाएको सोलर भएकाले नगर जिम्मेवार हुनुपर्ने उनको भनाई छ ।
पुरा भएन मेयर खनालको प्रतिवद्धता
गत ०७५ साउनमा नै बराहक्षेत्र नगरपालिकाका मेयर निलम खनालले पत्रकारहरुको जिज्ञासामा एक हप्ताभित्र बत्ति फेर्ने प्रतिवद्धता जनाएका थिए । सोलर बत्ति फेर्ने भनि गरेको प्रतिवद्धता गरेको एक वर्ष भइसकेको छ । अझैपनि बत्ति फेरिएको छैन । नगरपालिकाले स्थानीय बजारको सुरक्षाका लागि सोलार बत्ति जडान गरेको हो ।
स्थानीय सरोकारवालाले सोलार उपकरणको गुणस्तर न्यून भएको भन्दै बिरोध जनाएका छन् । सोलर बत्ति जडान गरेकै केही हप्तामा बिग्रन थालेको थियो । सेन्सर प्रविधिको सोलर बत्ति करिब १ महिना अगाडिसम्म धिपधिप गरेर बल्ने गरेपनि यतिबेला निभ्न थालेको छ ।
सोलर बत्तिको १ वर्ष ग्यारेन्टी र २ वर्ष वारेन्टी दिइएको छ । बत्तिको मूल्य प्रति सोलर सेट २५ हजार ५ सय परेको बताइएको छ ।
