सुनसरी । बराहक्षेत्र नगरपालिका केही महिना अघिसम्म दमकल थिएन । नगरभित्र आगलागी भए धरान, इटहरी, इनरुवालगायतकका दमकलमा भर पर्नुपर्ने अवस्था थियो । तर बराहक्षेत्र नगरपालिकाले यो बाध्यता हटाउन करिब डेढ महिना अघि ५३ लाख रुपैयाँको खर्चमा दमकल खरिद गर्यो ।
दमकल खरिद गरेपछि बराहक्षेत्र नगरका कर्मचारीहरुलाई कसरी आगो नियन्त्रण गर्ने र कसरी दमकलबाट पानी भर्ने, पानी लगाउने जस्ता प्राथमिक कामहरु दमकल उपलब्ध गराउने कम्पनीले केही तरिका सिकाए । नगरले दमकल खरिद गर्दा सबै नगरवासी खुसी भए । आगलागी भइहाले अब धेरै क्षति नहुनेमा विश्वस्त पनि भए ।्
मंगलबार (हिजो) राति बराहक्षेत्र ५ कालाबन्जरदेखि तिनकुने जाने बाटो स्कुलको ब्यापारिक भवनमा रहेको होटल तथा पसलहरुमा भीषण आगलागी थियो । करिब ९ बजे आगलागी सुरु भएको थियो । आगलागी भएको देख्ने सबैले नगरको दमकलमा फोन गर्न थाले । उता नगरपालिकाबाट ‘चालक छैन’ इटहरी वा धरानबाट बोलाउनु भन्ने जवाफ आयो । यस्तो जवाफले नगरवासी निराश बने ।
इलाका प्रहरी कार्यालय भरौल तथा स्थानीयले बाहिरबाट दमकल नआउन्जेल आगो नियन्त्रणका लागि प्रयास गरिरहे । स्थानीय देबबहादुर कार्कीको होटलसँगै रहेको गोबिन्द बिष्टको होलसेल किराना पसलबाट बिजुली सर्ट भई आगो सुरु भएको स्थानीय बताउँछन् । दमकल इटहरीबाट आइपुग्दा बिष्टको र कार्कीको पसल जलेर पूर्ण रुपमा नष्ट भयो ।
सटर लगाएकोले गर्दा केहि सामन झिक्न पाएनन् । त्यस भित्र रहेको नगदसहित पेयपदार्थ, नगरिकतालगायत सम्पुर्ण सामान जलेर नस्ट भएको देबबहादुर कार्कीले बताए । ‘तिहार नजिकै गर्दा मेरो होटलमा सामानहरु थपेको थिएँ,’ उनले भने । कार्कीको करिब २० लाख रुपैयाँ बराबरको क्षति भएको प्रहरीको अनुमान छ । होटलसँगै जोडिएको गोबिन्द बिष्टको होलसेल किराना पसल समेत जल्यो ।
यता छेउका अन्य पसलहरु भने पूर्णरुपमा जल्न पाएनन् । तथापी करिब १० लाख रुपैयाँ नोक्सान भएको स्थानीको भनाइ छ । आगलागी पीडित कार्कीले बराहक्षेत्रबाटै दमकल आएको भए यति क्षति नहुने बताए ।
आगलागीबाट मानवीय क्षति भने नभएको प्रहरीले जनाएको छ । स्थानियवासि, नेपाल प्रहरी, सशस्त्र प्रहरी चतरा, इटहरी र धरानबाट आएको बारुण यन्त्रको प्रयासमा करिब ३ घण्टामा आगो नियन्त्रणमा आएको थियो । उता नगरले दमकल खरिद गरेको डेढ महिनासम्म पनि चालक व्यवस्था गर्न नसक्दा आक्रोशित भएका छन् ।
