सुनसरी । बराहक्षेत्र ३ नडाहामा रहेको किमुलिसा क्लबको नयाँ पुस्ताका युवाहरुले यसवर्षको तिहारमा संकलन गरेको रकम सामाजिक काममा खर्च गरेका छन् ।
२०४९ सालमा स्थापना भएको सो क्लबले अघिल्लो वर्षदेखि देउसीभैलो खेल्दैआएको छ ।क्लबले लाइभ कन्सर्टको माध्यमबाट गीत गाउँदै, बाजा बजाउँदै देउसी खेल्ने गरेको नयाँ पुस्ताका युवा सुगम राईले बताए । क्लबले गतवर्षदेखि नै देउसीबाट संकलित रकम सामाजिक कार्यमा हस्तान्तरण गर्दै आइरहेको छ ।
क्लबले यस वर्ष १४ कात्र्तिकमा नडाहा चौकमा एकदिने देउसी खेलेको थियो । क्लबले देउसीभैलोबाट १ लाख २७ हजार ६ सय ६० रुपैयाँ संकलन गरेको थियो ।
उक्त कार्यक्रमका लागि १० हजार रुपैयाँ खर्च छुट्याएको र नपुगेको रकम पुरानो बचत रकमबाट खर्च गर्ने क्लबले जनाएको छ । संकलन पछि बचत भएको १ लाख १७ हजार रुपैयाँमा शारीरिक समस्या भएका क्लबका नयाँ पुस्ताका सदस्य साथै गायक बराहक्षेत्र ३ जलुव बस्ने बिबेक लिम्बुलाई आधा रकम ५८ हजार ८ सय ३० रुपैयाँ हस्तान्तरण गरेको छ ।
बाँकी रकम नडाहामा बन्न लागेको अस्थाई प्रहरी चौकीलाई बाँकी रकम हस्तान्तरण गर्ने किमुलिसा क्लब बराहक्षेत्र ३ नडाहा नयाँ पुस्ताका संयोजक लोकेन्द्र एभेगले बताए ।
संकलित रकम शुक्रबार क्लबका अध्यक्ष राणाङ्ग लिम्बु, वडाध्यक्ष रुद्र दाहाल, क्लबका सबै सदस्य तथा पदाधिकारीहरुको उपस्थितीमा लिम्बुको घरमा पुगेर संयोजक, अध्यक्ष, वडाअध्यक्षलगायतले हस्तान्तरण गरे । लिम्बु दुर्घटनाबाट घाइते भइ उपचाररत छन् । उनकाे उपचारका लागि रकम हस्तान्तरण गरिएकाे क्लबले जनाएकाे छ ।
