सुनसरी । फुटबल खेल्दा घाइते भएका बराहक्षेत्र नगरपालिका ३ बाङ्गेका १६ वर्षीय खेलाडी प्रज्वल राईलाई गोलनेपाल डटकममार्फत संकलित रकम हस्तान्तरण गरिएको छ ।
फुटबल खेल्न असाध्यै मन पराउने राई कार्तिक ७ गते धरानको फेयर एफसी फुटबल क्लबबाट फुटबल खेल्ने क्रममा घाइते भएका थिए । प्रतिस्पर्धि टिमले लडाउँदा घाइते भएका राईको पछाडिको ढाडको हड्डी भाँचिएको थियो ।
घाइते भएको राईलाई उपचार गर्न धरानको वि.पि.मेमोरियल हस्पिटलमा भर्ना गरिएको थियो । उपचारमा थप समस्या भएपछि गोलनेपालमार्फत उपचारार्थ संकलन गरिएको थियो । गोलनेपाल तथा समर्थकमार्फत संकलित ४ लाख ६६ हजार १ सय २९ रुपैयाँ गोलनेपालका प्रदेश १ प्रतिनिधि जनम बरालले हस्तान्तरण गरेका हुन् ।
उपचारको क्रममा राईको परिवरसँग भएको र ऋणदातासँग खोजेर करिब ५ लाख ५० हजार खर्च भएपछि अन्य सहयोगी हातबाट उपचारार्थ रकम संकलन हुन थालेको हो ।
स्थानीय अमृत राईले गोल नेपालका प्रदेश १ प्रतिनिधि बराललाई घटनाबारे जानकारी गराएका थिए । बरालले गोल नेपालको वेभसाइटमा घाइते राईको एउटा भिडियो पोस्ट गरेका थिए । त्यसपछि गोलनेपालले अभियान नै चलाएको थियो । घाइते राईको उपचारका लागि एभरेष्ट फुटबल क्लब बराहक्षेत्र ३ नडाहाले १५ हजार रुपैयाँ सहयोग गरेको छ ।
उपचार खर्च वापत संकलित सहयोग रकम आइतबार एक कार्यक्रमका बीच राईको घरमा गइ परिवारलाई हस्तान्तरण गरिएको हो । घाइतेको बुबा जय प्रकाश राईले सरकारले १ लाख रुपैयाँ छुट दिएको जानकारी दिँदै गोलनेपाल तथा सहयोग गर्ने सबै समर्थकहरुलाई धन्यवाद व्यक्त गरे ।
उनलाई उपचारका लागि अस्पताल लगेपछि उनको मेरुदण्डको शल्यक्रिया गर्नुपर्ने बताइएको थियो । कमजोर आर्थिक अवस्था भएको राईको परिवारलाई उपचार खर्चका लागि सहयोगको अपिल गरेका थिए ।
