इनरुवा । जिल्ला सदरमुकाम इनरुवाका व्यापारी कारी यादवको हत्या आरोपमा छिमेकी दम्पती पक्राउ परेका छन् ।
जग्गाको कारोबार गर्दै आएका इनरुवा ३ का ४० वर्षीय यादवको शव बुधबार बिहान फेला परेको थियो । यादवले छिमेकी अनिता पन्डितसँग त्रिmयाकलाप गरिरहेको अवस्था पंडितका श्रीमान अशोकले फेला पारेपछि भाँडा बनाउने घरेलु हतियारले पछाडिबाट आक्रमण गरि घाटीमा पलाष्टिकको डोरी बाँधेर यादवको हत्या गरेको अनुसंधानबाट खुलेको छ ।
हत्यामा श्रीमान र श्रीमती दुवैको संलग्नता रहेको अनुसंधानमा पाइएको छ। यादव हत्यामा छिमेकी अशोक र उनकी श्रीमती अनिताको प्रत्यक्ष संलग्नता खुलेको प्रहरीले जनाएको छ । जिल्ला प्रहरी कार्यालय सुनसरीले पत्रकार सम्मेलन गरि हत्यामा संलग्न दुवैलाई सार्वजनिक समेत गरेको छ ।
पक्राउ परेकाहरुसँगको बयान तथा खोज अनुसन्धानका क्रममा कारी यादवको हत्यामा अनैतिक सम्बन्ध प्रमुख कारक रहेको खुलेको हो । अनिता र यादवबीच अनैतिक सम्वन्धको रहेको अनुसन्धानको क्रममा समेत खुल्न आएको प्रहरीले जनाएको छ । कल डिटेल्स र वस्तुस्थिति अध्ययनका क्रममा अशोक र अनितालाई पक्राउ गरि प्रहरीले म्याद थप समेत गरेको छ ।
प्रहरी उपरीक्षक यज्ञबिनोद पोखरेलले पत्रकार सम्मेलन गरि घटना विवरण सार्वजनिक गरेका हुन् । पत्रकार सम्मेलनकाबीच अशोक र अनिताले हत्या गरेको समेत स्वीकार गरेकाछन् । पत्रकार सम्मेलनमा अनिताले कारीले बोलाएर आफुमाथि जबरजस्ती गर्न खोजेको बताएकी छिन् ।
पत्रकार सम्मेलनमा दिइएको जानकारी अनुसार राति ११ बजे कारी र अनिताबीच फोनमा कुराकानी भएपश्चात हत्या भएको जानकारी प्रहरीले दिएको छ । प्रहरीका अनुसार कारीले फोन गरेर अनितालाई घरबाहिर बोलाएका थिए ।
हत्या पश्चात अशोकले यादवको शव घिसारेर मृतक यादवकै घर पछाडी लगि छाडेका थिए । अनिताले भने कारीको मोबाइल आगोमा हालेर डढाएकी थिइन् ।
