सुनसरी । बराहक्षेत्र नगरपालिका भरि जनता आवास बस्ती निर्माण कार्य कतै सुरु भएको छ भने कतै अन्तिम चरणमा पुगेको छ ।
घर बनाउन नसक्ने जनताका लागि शहरी विकास मन्त्रालयले ३ लाख ३२ हजार प्रतिगोटा घर निर्माण खर्चमा घर बनाउने गरि रमेश मेहताले बराहक्षेत्र ३ मा २० वटा घर निर्माण गर्ने ठेक्का लिएका थिए ।
बराहक्षेत्र ३ मा मात्र २० वटा घर निर्माण हुँदैछ । यस वडामा निर्माण भएका घरहरु नक्सा बिपरित भएको र घर बनाउन प्रयोग गरिने इँटा तथा बालुवा कमसल प्रयोग गरेको पाइएको छ । त्यसैगरी उक्त घरमा लगाउने झ्यालढोका २ × ३ (दुई X तीन फिट) साइजको प्रयोग गरिएको र पर्खालहरु नमिलाइ बांगिएको पाइएको हो ।
निर्माण समितिका अध्यक्ष टेकबहादुर कामीले भने आफुलाई केही थाहा नभएको बताए । ‘मलाई केहि थाहा छैन, मलाई अध्यक्ष मात्र बनाएको हो,’ उनले भने, ‘के कति सिमेन्ट प्रयोग गर्ने, कसरी बनाउने केही थाहा छैन ।’ वडा ३ मा बन्दै गरेका घरमा २७ बोरा सिमेन्ट प्रयोग गरिएको पाइएको छ । कांग्रेस बराहक्षेत्र ३ का सभापति नारायणप्रसाद निरौलाको टोलिले अन्य वडा निर्माण भएको घरको निरीक्षण गर्दा एउटै योजना एउटै लागत र नक्सा बमोजिम अनुसार घर निर्माण गर्दै गरेको पाइएको निरौलाले बताए ।
चक्रघटिमा बन्दै गरेका घर ४५ देखि ५० बोरा सिमेन्ट लगाएको र घरको जग करिब ३ फिट खनेर ढुंङ्गा लगाइ १२ इन्च गारो लगाई माथिबाट इटा लगाएको थियो । बराहक्षेत्र ३ मा बन्दै गरेको घरको जगमा ढुंङ्गा प्रयोग नगरी एउटामात्र रड प्रयोग गरिएको पाइएको उनले बताए ।
गुणस्तरहीन काम गरेको भन्दै कांग्रेस बराहक्षेत्र ३ समितिले प्रेस विज्ञप्ती समेत निकालेको छ । सम्बन्धित निकायले ध्यान नदिए कडा कदम चलाउन बाध्य हुने कांग्रेस बराहक्षेत्र ३ ले जनाएको छ । अन्य वडामा बन्दै गरेका घरहरु मापदण्ड पुरा भएको तर ३ नम्बर वडामा बनेका घर मापदणड विपरित भएको कांग्रेसका जिल्ला सदस्य राजदिप लामाले बताए ।
टेलिफोन सम्पर्कमा घर निर्माण गर्ने मध्ये एक रमेश मण्डलले भने २० वटा घर मध्ये ९ वटा घर बिग्रिएको र ती घरलाई पुनःमर्मत गर्ने बताए । एउटा घर निर्माण पुरा गर्दा प्रति घर कामदारले २५ हजार रुपैयाँ पाउने गरेको समेत खुलेको छ ।
