बिनोद आचार्य, रामधुनी । सुनसरीको रामधुनी नगरपालिका ६ ईचौलमा प्रथम सुनसरी नगर स्तारीय कराते प्रतियोगिता हुने भएको छ ।
आगामी १० र ११ माघमा संचालन हुने प्रतियोगितामा ७ नगरका खेलाडीहरुको सहभागिता रहने आयोजक रामधुनी ईचौल डोजो कराते संघका अध्यक्ष भिखन राजधामीले जनकारी दिए ।
प्रतियोगिताको उपाधिका लागि धरान उपमहानगरपालिका, इटहरी उपमहानगरपालिका, रामधुनी नगरपालिका, दुहबी नगरपालिका, इनरुवा नगरपालिका, बराह नगरपालिका र आयोजक ईचौलका खेलाडीबीच २२ स्वर्ण,२२ रजत र ४४ कास्य पदकको लागि प्रतिस्पर्धा हुनेछ ।
बिजेता, उप–बिजेता र तेस्रो हुनेले नगद पुरस्कार पाउने आयोजकले जनाएको छ । प्रतियोगिता संचालन गर्नका लागि ४ लाख रूपैयाँ बराबर खर्च हुने आयोजक समितिका सचिव एलिन श्रेष्ठले जानकारी दिइन् ।
पर्यटन वर्ष २०२० लाई लक्षित गरेर रामधुनीका धार्मिक तथा पर्यटकीय स्थलको प्रचारप्रचारका साथै आन्तरिक तथा वाह्य पर्यटकलाई खेलको माध्यमबाट रामधुनीका पर्यटकीय स्थलहरुको प्रचारप्रचार गर्ने उद्देश्यले प्रतियोगिताको आयोजना गरिएको अध्यक्ष राजधामीले बताए ।