सुनसरी । नेपाल तामाङ घेदुङ बराहक्षेत्र नगरकार्य समितिले २८५६ औं जीव ल्हो छ्युखाम सोनाम ल्होछार बराहक्षेत्र ३ बिचपानीमा मनाएको छ ।
बराहक्षेत्र नगरपालिका भरी रहेको नेपाल तामाङ घेदुङहरुको बाक्लो उपस्थितिमा कार्यक्रम गरी तामाङ घेदुङ समुदायको नयाँ वर्ष सोनाम ल्होछार मनाएको अध्यक्ष तिलक तामाङ ग्लानले बताए ।
आजदेखि सुँगुर वर्ष पूरा गरी मुसा वर्ष प्रवेश गरेर सबैको घर आँगनमा सुख शान्ति आउने तामाङको भनाइ छ । उनका अनुसार तामाङ घेदुङ समुदायमा मुसा, गाई, बाघ, खरायो, ड्रागन अर्थात मेघ, सर्प, घोडा, भेडा, बाँदर, चरा, कुकुर र सुँगुर गरी १२ वर्षमा सोनाम ल्होछारलाई विभाजन गरिएको छ ।
उक्त कार्यक्रममा तामाङ जातिको मौलिक भेषभूषामा सजिएका र मौलिक संस्कृति झल्किने नृत्य तथा झाँकीहरु समेत प्रस्तुत गरिएको थियो । कार्यक्रम वक्ताहरुले यस मौलिक परम्परा भाषा संस्कृति हराउँदै गएकोले यसलाई नयाँ पुस्ताहरुले जगेर्ना गर्नुपर्नेमा जोड दिए ।
कार्यक्रममा प्रमुख अतिथि बराहक्षेत्र नगर प्रमुख निलम खनाले यस नगरपालिकाले सबै धर्म, भाषा, संस्कृति जोगाउनका लागि बजेट समेत छुट्याउको जानकारी दिए । ‘यस नगरपालिकाले मन्दिर हरुलाई मात्र बजेट छुटाएको भन्ने सबैमा भ्रम छ,’ उनले भने, ‘तपाइहरु त्यो भ्रमबाट मुक्त हुनुपर्छ, नगरपालिकाले प्रत्येक वर्ष विभिन्न जातजाति धर्म संस्कृतिहरुका लागि बजेट छुट्याएको हुन्छ ।’ उनले स्थानीय तहको सरकारले सबैसँग तोमालो गर्ने समेत प्रतिबद्धता जनाएका थिए ।
उक्त कार्यक्रम बराहक्षेत्र नगर अध्यक्ष तिलक तामाङ ग्लानको सभापतित्व रहेको थियो । जिल्ला सुनसरीका वरिष्ठ उपाध्यक्ष बुद्धिबहादुर तामाङ लगायत विभिन्न गुम्बा अध्यक्ष आदिवासी जनजाति बाक्लो उपस्थिति रहेको कार्यक्रम संचालक साथै नगर सचिव लालबहादुर तामाङ ग्लानले बताए ।
