बराहक्षेत्र । सुनसरी बराहक्षेत्र ८ मा अवस्थित नगरको पहिलो संस्थागत विद्यालय ज्योति इङलिस स्कुलले कक्षा ११ उतिर्ण विद्यार्थीलाई सम्मान गरेको छ ।
पहिलो पटक सञ्चालन गरेको कक्षा ११ मा राम्रो नतिजा ल्याउने विद्यार्थीहरुलाई शनिवार आयोजित अभिभावक दिवसमा प्रशंसा पत्रले सम्मान गरेको हो ।
स्कुलबाट ११ कक्षाको परिक्षा उतिर्ण गरेका ६ जना एरिका गौतम, सुरज साह, चित्रमान राई, मनिसा साह, सुदिप थापा, सुष्मा परियार सम्मानित भएका हुन् ।
उक्त अवसरमा प्रमुख अतिथि नगरपालिका शिक्षा शाखाका प्रमुख डिल्लीराम अधिकारीले २०७९ सालसम्ममा कक्षा १ देखि १२ सम्मका सबै पाठयपुस्तक परिमार्जन हुने बताए ।
अहिलेको अवस्थामा प्राविधिक शिक्षा आवश्यक भएको हुँदा विद्यालयलाई प्राविधिक शिक्षामा जोड दिन समेत सुझाव दिए । स्कुलले शैक्षिक क्षेत्रमा राम्रो प्रगति हासिल गरेको बताउँदै प्रसंशा गरे ।
उनका अनुसार नगरपालिकामा ९३ विद्यालय मध्ये सामुदायिक ५२, संस्थागत ३१ र धार्मिक ५ वटा रहेका छन् । साथै क्याम्पस २ र सामुदायिक सिकाई केन्द्र ३ रहेका छन् ।
उक्त अवसरमा बालबालिकाले संगीत, नृत्य, नाटक तथा फेसन शो प्रस्तुत गरे । कार्यक्रम व्यवस्थापन समिति अध्यक्ष दिलबहादुर बस्नेतको सभापतित्वमा कार्यक्रम भएको थियो ।
