बराहक्षेत्र । नेपालमै पहिलोपटक राष्ट्रिय मान्यता प्राप्त सुनसरीमा अवस्थित बराहक्षेत्र नगरपालिका ७ मा सर्पदंसको उपचार हुने एन्टी स्नेक भेनम सेरुम रिसर्च एन्ड म्यानिफ्याक्चरिङ प्रालिले अबको ६ महिनामा औषधि उत्पादन गर्ने तयारी गरिरहेको छ । अबको ६ महिनामा पहिलो चरण औषधि निर्माण गर्ने गरीे काम तीब्र रुपमा अघि बढिरहेको छ ।
नेपालमा बिषालु सर्पको टोकाईले प्रत्येक वर्ष धेरै बालबालिका तथा मानिसको मृत्युु भइरहेको हुँदा यसलाई स्वदेशमै निर्मुल गर्न सो सर्पदंसको उद्योग सञ्चालनमा ल्याएको प्रालिका अध्यक्ष लक्ष्मी फुयालले बताए ।
सर्पदंसको औषधी उत्पादन गर्न सर्पको विष घोडाको शरीरमा प्रवेश गराइन्छ र केही दिनमा घोडाले शरीरमा एन्टी बडी तयार गर्दछ । त्यसपछि उक्त घोडाबाट रगत झिकेर वैज्ञानिक विधिबाट प्रसोधन गरि औषधी तयार गरिन्छ ।
अहिले भवन निर्माणको काम तीब्र गतिमा भइरहेको छ । सो भवन ८८ करोड ६३ लाख रुपैयाँको आर्थिक लागतमा सम्पन्न गरिसक्ने र अबको ६ महिनामा कुनै समस्या नआए पहिलो चरणमा औषधी उत्पादन गर्ने फुयालले जानकारी दिए ।
यसलाई प्रदेश स्तरबाट मात्र नभई एउटा रास्ट्रिय गौरवको आयोजनाका रुपमा हेर्दै सरकारले आर्थिक तथा प्राविधिक रूपमा आवश्यकता अनुरुप सहयोग समेत गर्नुपर्ने अध्यक्ष फुयालले आग्रह गरेका छन् ।
