बराहक्षेत्र । प्रदेशकै उत्कृष्टमा पर्न सफल भएको बराहक्षेत्र नगरपालिका वडा नम्बर ५ कालाबन्जारमा रहेको जगन्नाथ डेडराज जनता माध्यमिक बिद्यालयको व्यवस्थापन समितिको अध्यक्षमा पुष्प ढुंगाना (ऋषि) चयन भएका छन् ।
२०७६ माघ २१ गते नै व्यवस्थापन समितिको ११ सदस्यीय समिति चयन गरिएको थियो । तर थीरबहादुर कार्की र पुष्प ढुंगानाबीच सहमति हुन नसक्दा अध्यक्ष पद खाली रहेको थियो । पटकपटक बैठक बस्दा समेत अध्यक्ष चयन हुन नसक्दा सदस्यहरुले गत भदौ १० गते बसेको बैठकले असोज २ गते बस्ने अर्को बैठकबाट जति सदस्यय आएपनी व्यवस्थापन समिति अध्यक्ष चयन गर्ने निर्णय भएको थियो ।
शुक्रबार(आज) बिहान ७ बजे जेष्ठ सदस्य केशव मैनालीको अध्यक्षतामा बसेको सो समितिको बैठकबाट ढुंगानालाई अध्यक्ष बनाउने बहुमत आएपनि उनलाई अध्यक्षको जिम्मेवारी दिएको विद्यालयका प्रधानाध्यापक साथै सदस्य सचिव हिरामणी पौडेल बताए ।
पौडेलले लामो समयको पर्खाइपछि आजबाट स्कुलले नयाँ व्यवस्थापन समितिको अध्यक्ष पाएको बताए । उनका अनुसार उक्त व्यवस्थापन समितिको कार्यकाल तीन वर्षको रहनेछ ।
अध्यक्षको दाबी गर्दै आएका कार्की र ढुंगानाबीच सहमति नहुँदा करिब ८ महिना स्कुलले नयाँ व्यवस्थापन समिति पाउन सकेको थिएन ।
सदस्यहरुमा थिरबहादुर कार्की, रमा खड्का, प्रेम कुमार थापा, केशव मैनाली, अमृत गौतम, डम्बर ध्वज थापा, कृष्ण ढकाल, मथुरा अधिकारी, पदेन सदस्य साथै वडाध्यक्ष राजु अधिकारी र सदस्य सचिव हिरामणी पौडेल चयन भएका हुन् ।
व्यवस्थापन समितिको अध्यक्ष भएपछी ढुंगानाले विद्यालयको शिक्षा नियमलाई टेकेर अगाडि बढ्ने र कुनै पनि महत्त्वपूर्ण निर्णयहरु गर्दा आफ्नो टिम साथै विद्यालय प्रशासन तथा सरोकारवालाहरुसँग सल्लाह गर्दै अघि बढ्ने बताए ।
