इटहरी । २९ औं अन्तर्राष्ट्रिय अपाङ्गता दिवसको अवसरमा इटहरी नमुना कलेजले बिहीबार अन्तरक्रिया कार्यक्रम सम्पन्न गरेको छ ।
लैंगिक हिंसाविरुद्धको १६ दिने अभियान अन्तरगत अन्तर्राष्ट्रिय अपांगता दिवसको अवसरमा कलेज तथा सामाजिक कार्य विभागले सो कार्यक्रम आयोजना गरेको हो ।
कार्यक्रममा सामाजिक अभियान्ता तथा दमक पब्लिक लाइब्रेरीका संस्थापक अध्यक्ष भेषराज न्यौपाने प्रमुख वक्ताका रुपमा रहेका थिए । भर्चुअल माध्यमबाट गरिएको सो कार्यक्रममा अपांगता भएका व्यक्तिप्रति सरकारले कस्तो भूमिका खेलेको छ ?, समाजले कस्तो दृष्टिले हेरेको छ ? भन्ने विषयमा वक्ताले आफ्नो धारणा राखेका थिए । यसका साथै वक्ता न्यौपानेले आफ्नो अनुभव तथा प्रेरणादायी विचार समेत राखेका थिए ।
कार्यक्रमको पहिलो सत्रमा वक्ताले विचार तथा अनुभव जानकारी गराएका थिए भने दोस्रो सत्रमा सहभागीको प्रश्नको जवाफ दिएका थिए । विद्यालय, शिक्षा, आर्थिक सहयोगलगायतका क्षेत्रमा सरकारको स्पष्ट नीति हुनुपर्ने न्यौपानेले बताए । कतिपय स्थानीय तह, संघसंस्थाहरुले अपांगमैत्री भवन नबनाएको र त्यस्ता भवनमा अपांगता भएका व्यक्तिहरु सहजै प्रवेश गर्न नसक्दा सेवा पाउन बाधा हुने गरेको उनको भनाइ छ ।
यस्ता चेतना मुलक कार्यक्रम आयोजना गर्न आवश्यक रहेको कलेजका अध्यक्ष तथा कार्यक्रमका सभापति केशव खड्काले बताए । समाजमा अझैपनि अपांगताभएका व्यक्तिहरुलाई हेर्ने दृष्टि परिवर्तन गर्न आवश्यक रहेको र यस्ता कार्यक्रमले सहयोग पुग्ने खड्काको भनाई थियो ।
बिहीबार विभिन्न संस्थाहरुले ‘कोभिड–१९ पश्चातको उत्कृष्ट पुनरागमनको सुनिश्चितता : अपाङ्गता भएका व्यक्तिको पहुँच र दिगो विकासका लागि हामी सबैको प्रतिबद्धता’ भन्ने नाराका साथ विविध कार्यक्रम गरि अन्तर्राष्ट्रिय अपाङ्गता दिवस मनाएका छन् । कलेज तथा समाजिक विभागले यस अघि पनि विभिन्न कार्यक्रम आयोजना गरिसकेकाे छ ।
