रामधुनी । गाउँमा भएका विकास निर्मणमा चरम आर्थिक अनियमितता गरेको भन्दै नेपाल तरुण दल रामधुनीले नगरपालिका वडा नम्बर ६ बक्लौरीकी वडा सदस्य लक्ष्मी चौधरीको राजीनामा मागेको छ ।
मंगलबार तरुण दल रामधुनीले वडा कार्यालयमा ज्ञापनपत्र बुझाउँदै बक्लौरीमा विकास निर्माणमा भएका चरम आर्थिक अनियमितताको छानविन र वडासदस्य चौधरीको राजीनामा माग गरेको हो ।
नगरपालिकाको वडा नम्बर ६ मा पर्ने साविकको बक्लौरी गाविस स्थित मैनीमा बनाइएको फलामे पुलमा वडाध्यक्षकै मिलेमतोमा आर्थिक अनियमितता भएको विषयमा तरुण दल रामधुनी वडा नम्बर ६ कार्यसमितिले वडाध्यक्ष राजधामीलाई ज्ञापन पत्र बुझाएको हो ।
कार्यबाहक सभापति पुस्कर बस्नेतको नेतृत्त्वमा तरुण दलले बुझाएको उक्त ज्ञापनपत्रमा भनिएको छ, ‘बक्लौरिमा आएको विकाश निर्माण तथा विविध कार्यक्रमहरु वडाबासीलाई जानकारी नै नगराई वडाध्यक्षकै मिलेमतोमा कार्यपालिका सदस्य लक्ष्मी चौधरीले आफन्तसँग मिलेर गरेको अनियमितताको विषयमा आएका समाचार र टिकाटिप्पणीप्रति गम्भीर भएका छौं।’
आफु र आफ्ना श्रीमान, आफन्तसँंगको मिलेमतोमा एकलौटी रुपमा गरिएका काममा व्यापक अनियमितता भएको ठहर गर्दै तरुण दलले विज्ञप्तिमा भनेको छ, ‘वडा सदस्यले आफु र आफ्नो श्रीमान र आफन्तलाई मात्र राखेर एकलौटी निर्णय गरि वडाबासीलाई धोका दिएको साथै वडाबासीको जान्ने बुझ्ने अधिकारबाट बन्चित गरि अनियमितता तथा भ्रस्टाचार गरेको भन्ने हामीले प्रष्ट बुझेका छौं।’
जनताको कर लिएर जनता नै ठग्ने यस्ता खाले बेथिति विरुद्द निरन्तर आवाज उठाउने बताउँदै तरुणदलले वडा सदस्य लक्ष्मी चौधरीले आफ्नै गाउँवासी विरुद्द गरेको गलत कार्यको भत्र्सना गर्दै चौधरी माथि छानविनको माग समेत गरेको छ ।