इटहरी । नेपाली कांग्रेस इटहरी २ का सभापति दीपेन्द्र घिमिरेले बागी उम्मेदवारी दिएपछि पार्टीले कार्यबाहक सभापतिको जिम्मा विशुधन राईलाई दिएको छ । सोमबार इटहरी २ मुक्तिनारायण मन्दिरमा बसेको बैठकले पार्टीको कार्यबाहक सभापतिको जिम्मेवारी राईलाई दिएको हो ।
घिमिरेले सुनसरी क्षेत्र नं. २ (क) बाट प्रदेशसभा सदस्यमा गठबन्धन विपरीत बागी उम्मेदवारी दिएसँगै उपसभापति रहेका राईलाई कार्यबाहक सभापतिको जिम्मेवारी दिइएको हो । राईलाई मंसिर १५ गतेसम्म कार्यबाहकको जिम्मा दिइएको हो ।
यस्तै, निर्वाचन अनुगमन तथा सल्लाहकार समितिको संयोजकमा फूलराज सुवेदीलाई चयन गरिएको छ । सुवेदीसहित पाँच सदस्यीय समिति गठन गरिएको हो । सुवेदी कांग्रेस इटहरीका पूर्व नगरसभापति हुन् । यो समितिले गठबन्धनसँग एजेन्डासहित बैठक बस्नेछ ।
भोला पाण्डेको संयोजकत्वमा पाँच सदस्यीय अनुशासन समिति समेत गठन गरिएको छ । यो समितिले भने बागी उम्मेदवारको पक्षमा रहेका कार्यकर्तालाई कारबाहीको सिफारिस गर्नेछ । पार्टी विधान विपरीत रहेका कार्यकर्तालाई यो समितिले नगरसमक्ष कारबाहीको सिफारिस गर्ने बताइएको छ ।
महाधिवेशन प्रतिनिधि, जिल्लाका प्रतिनिधिहरूसहित बसेको बैठकमा कांग्रेस इटहरी नगरसभापति हेमकर्ण पौडेलले अहिले गठबन्धनको विकल्प नरहेको बताए । पार्टीको निर्देशन अनुसार निर्वाचनमा होमिन समेत उनको निर्देशन थियो ।
