नेपाली कांग्रेसले संसदीय दलको नेता चयन गर्ने प्रक्रिया सुरू गर्ने तयारी गरेको छ । पुस ३ गतेपछि उक्त प्रकृयाले मुर्तरुप लिने कांग्रेसले जनाएको छ । निर्वाचन आयोगले प्रतिनिधिसभातर्फ समानुपातिक सांसदलाई पुस ३ गते प्रमाण पत्र दिने तयारी गरेको छ ।
समानुपातिक सांसदले निर्वाचित भएको प्रमाणपत्र बुझे लगत्तै संसदीय दलको नेता चयनका बारेमा छलफल अघि बढाउने कांग्रेसले जनाएको छ ।
कांग्रेसले प्रतिनिधिसभामा प्रत्यक्षतर्फ ५७ र समानुपातिकतर्फ ३२ गरी ८९ सिट जित हासिल गर्न सफल भएको छ। कांग्रेस सहमहामन्त्री जीवन परियारले संसदीय दलको नेता चयनबारे अनौपचारिक कुराकानी भइरहे पनि औपचारिक छलफल भने पुस ३ गतेपछि मात्रै सुरु हुने बताए । सुरुमा संसदीय दलको नेता चयन सहमतिमा गर्ने प्रयास गरिने परियारको भनाई थियो । सहमतिमा कुरा मिल्न नसके निर्वाचन गरेर टुंगोमा पुग्ने कांग्रेसको तयारी छ ।
सभापति शेरबहादुर देउवा पुनः संसदीय दलको नेताका लागि उम्मेदवार हुने तयारीमा छन् । यता रामचन्द्र पौडेल,शेखर कोइराला सँगै महामन्त्री गगन थापा पनि आकाक्षी देखिएका छन् ।
महामन्त्री थापाले त चुनाव लड्दादेखि नै आफू संसदीय दलको नेता उठ्ने र जितेमा प्रधानमन्त्री हुने बताएका अठोट लिएका छन् । उनलाई अर्का महामन्त्री विश्वप्रकाश शर्माको पनि साथ रहेको छ भने डाक्टर शेखर कोइराला पनि संसदीय दलको नेता उठ्ने तयारीमा छन् ।
