सुनसरी । नेकपा (एमाले)का पुर्व मन्त्री तथा स्थायी समितिका सदस्य तथा प्रदेश सभा संसदीय दलकाे नेता समेत रहेका हिक्मतकुमार कार्की प्रदेश नम्बर १ को मुख्यमन्त्रीमा नियुक्त भएका छन् । आइतबार अपरान्ह आन्तरिक मामिला मन्त्रालयका पुर्व मन्त्री समेत रहेका कार्कीलाई प्रदेश प्रमुख पर्शुराम खापुङले मुख्यमन्त्री नियुक्त गरेका हुन् ।
संविधानको धारा १६८ को उपधारा २ बमोजिम प्रदेश सभामा प्रतिनिधित्व गर्ने दुई भन्दा बढी दलको समर्थनकाे हस्ताक्षरका साथ दाबी प्रस्तुत गरेका कार्कीलाई प्रदेश प्रमुख खापुङले मुख्यमन्त्री नियुक्त गरेका हुन् ।
नवनियुक्त मुख्मन्त्री कार्कीले सत्ता साझेदार दलका नेता नेकपा (माओवादी केन्द्र)का नेता इन्द्रबहादुर आङ्बो, राष्ट्रिय प्रजातन्त्र पार्टी संसदीय दलका नेता भक्तिप्रसाद सिटौला र जनता समाजवादी पार्टीका सांसद निर्मला लिम्बूसहितको समर्थनकाे हस्ताक्षरका साथ नयाँ सरकार गठनका लागि प्रदेश प्रमुखको कार्यालयमा पुगेर दाबी प्रस्तुत गरेका थिए ।
प्रदेशसभाको सबैभन्दा ठूलो दल भएको नेकपा एमालेको ४०, नेकपा माओवादी केन्द्रको १३, राप्रपाको ६ र जनता समाजवादी पार्टीको एक सहित ६० सिटको सहमतिय हस्ताक्षर साहित कार्कीले मुख्यमन्त्रीको दाबी प्रस्तुत गरेका थिए ।
प्रदेश संरचना निर्माण भएपछि प्रदेश १ मा कार्की चौथो मुख्यमन्त्रीको रुपमा नियुक्त भएका हुन् । नियुक्त पश्चात पत्रकारहरुसंग कुरा गर्दै नवनियुक्त कार्कीले सबै पक्षलाई मिलाएर लैजाने बताए ।
‘गठबन्धनमा आवद्ध र अन्य दलहरुसँग छलफल गरी सबैलाई मिलाएर लैजाने मेरो प्रयत्न हुन्छ’ उनले भने ।
