सुनसरी । प्रधानमन्त्री पुष्पकमल दाहालले बहुमतका साथ विश्वासको मत पाएका छन् । संविधानको धारा ७६ उपधारा २ बमोजिम प्रधानमन्त्रीमा नियुक्त भएका दाहालले मंगलबार संविधानको धारा ७६ को उपधारा ४ मा भएको व्यवस्थाबमोजिम प्रतिनिधिसभाबाट विश्वासको मत लिएका हुन् ।
गत पुस १० गते सात दल र तीन स्वतन्त्र गरी १६९ सांसदको समर्थनसहित प्रधानमन्त्री नियुक्त भएका प्रधानमन्त्री दाहाललाई २६८ सांसदले विश्वासको मत दिएका छन् ।
संसदको सबैभन्दा ठुलो दलका रुपमा रहेका नेपाली कांग्रेसका संसदीय दलका नेता शेरबहादुर देउवाले हृवीप नै जारी गर्दै प्रधानमन्त्री दाहाललाई विश्वासको मत दिएका हुन् ।
मंगलबार भएको विश्वासको मतदानमा २७० सांसदमात्रै सहभागी भएका थिए । प्रधानमन्त्री दाहालले कुल २७० सांसद मतदानमा २६८ मत आफ्नो पक्षमा पार्न सफल भएकाछन् ।
प्रधानमन्त्रीको पक्षमा नेपाल मजदुर किसान पार्टीका प्रेम सुवाल र राष्ट्रिय जनमोर्चाका चित्रबहादुर केसीबाहेक सबै दल र स्वतन्त्र सांसदहरूले प्रधानमन्त्री दाहाललाई विश्वासको मत दिएका छन् ।
नेपाली कांग्रसका किशोरसिंह राठोर, मनोरमा शेरचन र अम्बिका बस्नेत भने मंगलबारको बैठकमा अनुपस्थित रहेका थिए ।
संविधानको धारा ७६ (४) ले उपधारा २ र ३ बमोजिम नियुक्त भएको प्रधानमन्त्रीले मनोनित भएको तीस दिनभित्र विश्वासको मत लिनुपर्ने संवैधानिक व्यवस्था छ ।
