सुनसरी । नेकपा (एमाले)का सचिव तथा प्रतिनिधिसभा उम्मेद्वार रहेका योगेश भट्टराईको निर्वाचन क्षेत्र रहेको ताप्लेजुङमा मतगणना कार्य सुरु भएको छ ।
मतपेटीका संकलन कार्यमा ढिलाई हुँदा मतगणना कार्य आजबाट सुरु भएको मुख्य निर्वाचन अधिकृतको कार्यालयले जनाएको छ । सर्वदलिय बैठकबाट वडागत रुपमा गणना गर्ने भए पछि निर्वाचनको मतगणना कार्य सोही निर्णयानुसार सुरु गरिएको हो ।
जिल्लाको उत्तरी फक्ताङलुङ गाउँपालिका ७ को ओलाङचुङगोला र याङमाको मत गणना गर्दा भट्टराईले ६८ मत ल्याउदै सुरुवाती अग्रता लिएका छन् । त्यस्तै सत्ता गठबन्धनको तर्फबाट माओवादी केन्द्रका खेलप्रसाद बुढाक्षेत्री (पराग)ले ३३ मत प्राप्त गर्दा राप्रपाका राम कार्कीले २ र लोकतान्त्रिक समाजवादीका चैतन्य प्रकाश केदेमले १ मत प्राप्त गरेको मुख्य निर्वाचन अधिकृतको कार्यालयले जनाएको छ ।
दोस्रो चरणको मतगणना फक्ताङलुङ गाउँपालिका ६ लेलेपको क र ख तथा घुन्सा र ग्याब्लाबाट सुरु भइसकेको छ ।
प्रतिनिधिसभा तर्फ एक मात्र निर्वाचन क्षेत्र रहेको ताप्लेजुङ जिल्लामा कुल ४८ हजार ३ सय ५५ मत खसेको छ ।
