सुनसरी । झापाको मेचीनगरमा रहेको चारआली जङ्गलमा भेटिएका शवको पहिचान खुलेको छ ।
सोमबार अपराह्न महिला र पुरुषको शव देखेपछि स्थानीयले प्रहरीलाई खबर गरेका थिए । महिलाको शव भुँइमा र पुरुषको शव रुखमा झुन्डिएको अवस्थामा भेटिएकाे थियाे ।
उक्त शव अर्जुनधारा ११ का नेत्रकुमार इङ्नाम लिम्बू र उनकै श्रीमती सन्जु इङ्नाम दम्पतिकाे रहेको प्रहरीले पुष्टि गरेको हो ।
लिम्बू दम्पतीको कुहिन लागेको शव सोमवार दिउँसो भेटिएको थियो । इलाका प्रहरी कार्यालय काँकडभिट्टाका प्रहरी नायब उपरीक्षक ज्ञानकुमार महतोका अनुसार इङ्नामको शव झुन्डिएको र सञ्जुको शव भुइँमा लडेको अवस्थामा भेटिएको थियो ।
प्रहरीले घटनास्थलबाट एउटा दाउ, दुई जोर चप्पल, डोरी फेला पारेको जनाएको छ ।
सोमवार दिउँसो जङ्गलभित्र घाँस, दाउरा टिप्न गएका स्थानीयले शव देखेपछि तत्काल प्रहरीलाई खबर गरेका थिए ।
दुवै शवको कानुनी प्रक्रिया पूरा गरी परीक्षणका लागि धरानस्थित वीपी कोइराला स्वास्थ्य विज्ञान प्रतिष्ठान पठाइएको प्रहरीले जनाएको छ । घटनाबारे थप अनुसन्धान भइरहेको छ ।
