पाँचथरमा भएको आगलागीमा जलेर एकै घरका दुईजनाको मृत्यु भएको छ ।
जिल्लाको सदरमुकाम फिदम -८ स्थित स्थानीय मेगबहादुर गुरुङको घरमा आगलागी हुँदा दुईको मृत्यु भएको हो ।
आगलागीमा जलेर गुरुङका छोरी र बुहारीको मृत्यु भएको प्रहरीले जनाएको छ । मृत्यु हुनेमा गुरुङकी बुहारी २३ वर्षीया आसानसिंह थेबे र २२ वर्षीय छोरी ममता गुरुङ रहेको जिल्ला प्रहरी कार्यालय पाँचथरले जनाएको छ ।
आगलागीमा परी ५५ वर्षीय मेघबहादुर गुरुङ र छोरा बिजेन्द्र गुरुङ घाइते भएका छन् । उनीहरूको पाँचथर अस्पतालमा उपचार भइरहेको जिल्ला प्रहरी कार्यालय पाँचथरमा डीएसपी हरि खतिवडाले जानकारी दिए ।
घरमा ७ जना सुतेकोमा २ जनाको मृत्यु भएको‚ २ जना घाइते भएको र ३ जनाले भागेर ज्यान जोगाएको उनले बताए । घटनास्थलमा जिल्ला प्रहरी कार्यालय पाँचथरबाट डीएसपी खतिवडा नेतृत्वको टोली पुगेर आगो नियन्त्रणसँगै उद्धार गरेको थियो ।
आगलागीबाट ५० लाख रुपैयाँ बराबरको क्षति भएको प्रहरीको प्रारम्भिक अनुमान छ । आगलागीको कारणबारे थप अनुसन्धान भइरहेको पाँचथर प्रहरीले जनाएको छ ।
