इटहरी । यौन शिक्षाको महत्व र आवश्यकतालाई बुझेर इटहरी नमुना कलेजका विद्यार्थीहरुले विद्यालय स्तरमा बृहत यौनिकता शिक्षा सम्बन्धि छलफल गरेका छन् । इटहरी उपमहानगरपालिका वडा नम्बर ८ स्थित सरस्वती सतन माध्यामिक विद्यालयका विद्यार्थीहरुसँग यौनिकता शिक्षाको बारेमा आइतबार छलफल गरेका हुन् ।
छलफल कार्यक्रममा किशोरकिशोरी अवस्थामा हुने परिवर्तन र यसले पार्ने असरको बारेमा गरिएको सो छलफलमा कक्षा ९ का करिब ४० जना विद्यार्थी सहभागी थिए । किशोरावस्थामा हुने परिवर्तन सबै सामान्य र प्राकृतिक परिवर्तन रहेको तथा यस उमेरमा हुने परिवर्तन जीवनको उत्तम परिवर्तन भएको विषयलाई प्राथामिकतामा राख्दै छलफल गरिएको कार्यक्रम संयोजक नवल रिजालले बताए ।
समाजमा हुने यौनजन्य अपराध जस्तै बलात्कार, करणी, एसिड प्रहार, आत्महत्या, डिप्रेसनजस्ता धेरै समस्याको समाधानको रुपमा यौन शिक्षा लिने गरिएको रिजालले जानकारी दिए ।
समग्र यस किसिमको सचेतना शिक्षा तथा छलफलले सिकाइ र स्वास्थ्यमा सकारात्मक प्रभाव देखिने सहजकर्ता होमिका श्रेष्ठले बताइन् । ‘विद्यालय र विद्यालयभन्दा बाहिर रहेका किशोरकिशोरीलाई यौन र यौनिकताका विषयमा सही निर्णय लिन, प्रजनन स्वास्थ्यका बारेमा ज्ञान प्राप्त गर्न सहयोग पुर्याउँछ,’ उनले भनिन्, ‘सामाजिक समस्या समाधान गर्न पनि त्यस्ता शिक्षा तथा छलफलले सहयोग गर्छ ।’
युवा विकास केन्द्रले स्मार्ट छोरी परियोजना अन्तर्गत विद्यालयमा यौनका विषयको महत्व र आवश्यकता सम्बन्धि अभियान तथा कार्यक्रम गरिरहेको छ । सो परियोजनामा इटहरी नमुना कलेजबाट प्रयोगात्मक अध्ययन गरिरहेका श्रेष्ठसहित प्रतिक कटेल, कृष्टिका कार्की, पुनम पोख्रेलले सहजीकरण गरेका थिए ।
