बराहक्षेत्र । सुनसरीको बराहक्षेत्र नगरपालिका वडा नम्बर ४ मा होम आइसोलेशनमा बस्दै आएका संक्रमितहरुको घरमा मंगलबार वडाध्यक्ष आशाराम चौधरीले सेनिटाइज गरेका छन् । साथै उनले संक्रमित व्यत्तिहरुलाई पौष्टिक आहार र स्वास्थ्य सामाग्री समेत प्रदान गर्नुका साथै स्वास्थ्यकर्मीमार्फत परामर्श समेत दिएका छन् ।
चौधरी संक्रमित बिरामीहरु बस्दै आएको घरमा सेनिटाइज गरि मास्क, सावुन, रोगसँग लड्न सक्ने क्षमता बढाउन विभिन्न प्रकारका गेडागुडी लिएर घरमै पुगेका हुन् । अहिले बराहक्षेत्रमा पनि दिनप्रतिदिन कोरोना संक्रमित बढ्दै गएपछि टोलिसहित घरघरमै पुगेर संक्रमितको स्वास्थ अवस्था बारेमा सोधपुछ गर्ने, स्वास्थ्य सामाग्री, पौष्टिक आहार प्रदान गर्न सुरु गरेको वडाध्यक्ष चौधरीले बताए ।
स्वास्थमा थप समस्या आएमा उनले आफुलगायत जनप्रतिनिधिलाई खबर गर्न आग्रह समेत गरेका छन् । चौधरीका अनुसार अहिले बराहक्षेत्र वडा नम्बर ४ मा १० जना संक्रमित रहेको र संक्रमितको अवस्था सामान्य रहेको छ ।
