धरान । धरान उपमहानगरपालिकाले शुक्रबार कृषकहरुलाई कालो बंगुरको पाठा/पाठी वितरण गरेको छ । २५ जना कृषकहरुलाई प्रति व्यक्ति ४ वटाका दरले १ सय वटा कालो बंगुरको पाठा/पाठी वितरण गरेको हो ।
धरान १३ स्थित कृषि उपज बजारमा शुक्रबार (आज) एक कार्यक्रमको आयोजना गरि धरान उपमहानगरपालिकाका मेयर तिलक राईले कृषकहरुलाई कालो बंगुरको पाठा/पाठी वितरण गरेका थिए ।
मेयर राईले कृषकहरुलाई उपयुक्त खोर बनाउन सुझाव दिँदै बंगुरको पाठा÷पाठी लगेर मास्न नहुने बताए । कृषकहरुलाई प्राविधिक ज्ञान र सहयोग रहने समेत उनको भनाइ थियो । बेला बेलामा कृषि शाखाका प्राविधिकहरुलाई बोलाएर परामर्श लिन पनि मेयर राईले आग्रह गरे । ‘धरान उपमहानगरपालिकाले अनुगमन पनि गर्छ । हप्ता दिनमा, महिना दिनमा,’ उनले भने, ‘अनुगमनमा हामिले दिएको बंगुरको पाठा/पाठी खोरमा भेटेनौं भने तपाइहरुलाई कारबाही पनि हुन्छ । जरिवाना पनि हुन्छ ।’
हरेक किसानले राज्यबाट अनुदान लिएपछि आफ्नो वरिपरिको छिमेकीहरुलाई प्राविधिक ज्ञान सीपहरु हस्तान्तरण गर्नुपर्ने मेयर राईको भनाई थियो । ‘किसानहरु सहिढंगबाट हिँड्नसक्यो भने स्थानीय सरकार, प्रदेश र केन्द्रीय सरकारले आवश्यक परेको खण्डमा अनुदान दिन सक्छ,’ मेयर राईले बताए ।
मेयर राईले पशुपालनबाट फाईदा लिन सकिने बताउँदै धरान उपमहानगरपालिकाले कालो बंगुरलाई प्रवर्द्धन गर्ने उद्देश्य लिएको बताए । यसवर्ष कृषकहरुलाई इटहरीबाट बंगुरको पाठा/पाठी ल्याएर वितरण गरिएको बताउँदै अर्को वर्ष वितरण गर्दा धरानमै उत्पादन भएको बंगुरको पाठा/पाठी वितरण गर्नुपर्नेमा मेयर राईले जोड दिए ।
धरान उपमहानगरपालिकाका पशु शाखाका अनुसार यस भन्दा अघि पनि २५ जना कृषकहरुलाई एक सय वटा बंगुरको पाठा/पाठी वितरण गरिएको थियो । यस्तै, दोश्रो चरण अन्तर्गत आज धरान वडा नं. ६ चौकीडाँडा बंगुर पालन कृषक समुह, वडा नं. ४ का खैरेनीटार बंगुर पालन कृषक समुहका २५ जना कृषकलाई छनौट गरेर एक सय वटा बंगुरको पाठा/पाठी वितरण गरिएको पशु शाखाले जनाएको छ । शाखाका अनुसार पहिलो चरण अन्तर्गत पत्रंगबारी बंगुर पालन कृषक समुहका छुटेका ५ जना कृषकलाई पनि आज बंगुरको पाठा/पाठी वितरण गरिएका छ ।
