इनरुवा । सुनसरीको भोक्राहा नरसिंह गाउँपालिका वार्ड नं. ७ का किसानहरूलाई शुक्रबार ५० प्रतिशत अनुदानमा उन्नत जातको धानको बीउ वितरण गरिएको छ ।
गरिबी उत्थान कृषक समूह भोक्राहा नरसिंह वार्ड नं.७ का अध्यक्ष राकेश कुमार मेहताले आर्थिक अवस्था कमजोर भएका स्थानीय ५० जना भन्दा बढी किसानहरूलाई धानको बीउ वितरण गरिएको बताए ।
सो समुहलाई भोक्राहा नरसिंह गाउपालिका अन्तरगतका कृषि शाखाले ५० प्रतिशत अनुदानमा किसानहरूलाई उन्नत जातको धानको बीउ वितरण गर्न कार्यक्रम उपलब्ध गराएपछि निष्पक्ष तरिकाबाट वितरण गरिएको वार्ड नं.७ का वडाध्यक्ष रामचन्द्र यादवले जानकारी दिए ।
त्यस्तै कार्यक्रमका विशेष अतिथि तथा मिथिला कृषि सहकारी संस्था लिमिटेड भोक्राहा नरसिंह गाउँपालिका वार्ड नं.७ का अध्यक्ष राजेन्द्र मेहताले भने ४ वर्षको अवधिमा किसानहरूका लागि गाउँपालिका अन्तरगत कृषि शाखाले महामारीको समयमा पनि किसानहरूको लागि सानो सहयोग गरेपनि किसानहरू खुशी भएको बताए । उनले गाउँपालिकाले अगामी दिनमा कृषि क्षेत्रमा थप बजेट छुट्टाउनु पर्ने, किसाहरूको घरघरमा पुगेर अवस्था बुझ्नुपर्नेमा जोड दिए ।
त्यस्तै कार्यक्रमका विशेष अतिथि एंव कृषि शाखा प्रमुख रेनुका चौधरीले अबका दिनमा भोक्राहा नरसिंह गाउँपालिका अन्तरगतका ८ वटै वडाका किसानहरूका लागि कुनै किसिमको भेदभाव नगरी समान रूपमा सहकारी मार्फत ५० प्रतिशत अनुदानमा धानको बीउ वितरण गर्न विभिन्न ११ वटा समूह तथा सहकारीसँग सम्झौता गरिएको बताइन् ।
त्यस्तै कृषसन्देश कृषि सहकारी संस्था लिमिटेड भोक्राहा नरसिंह वार्ड नं.१ का अध्यक्ष रूद्रनारायण साहले पछिल्लो ४ वर्षमा पहिलो पटक यस पालिकाले किसानहरूको लागि ५० प्रतिशत अनुदानमा विभिन्न कार्यक्रम सञ्चालन गरेकोमा खुशी भएको बताए ।
