रामधुनी । सुनसरीको रामधुनी नगरपालिका ८ मा निःशुल्क पशु स्वास्थ्य तथा बाझोपन शिविर सम्पन्न भएको छ । नेपाल पाराभेटेरीनरी एण्ड लाइभस्टक एसोसिएसन सुनसरीको ३१औं स्थापना दिवसको अवसरमा आइतबार शिविर सम्पन्न भएको हो ।
एसोसिएसनको आयोजनामा भएको शिविरलाई रामधुनी वडा नम्बर ८ र ९ ले सहयाेग गरेको थियो । पशुपालक किसानलाई गाउँमै सेवा प्रवाह गर्ने उद्देश्यले पशुको स्वास्थ्य परीक्षण, जाँच र बाँझोपन निवारण कार्यक्रम गरिएको एसोसिएसनका जिल्ला अध्यक्ष गणेशप्रसाद मेहताले बताए ।
शिविर उद्घाटनमा रामधुनीका नगरप्रमुख जयप्रकाश चौधरीले पशुमा हुने बाँझोपनलाई निवारण गर्न किसान सचेत हुनुपर्नेमा जोड दिए । उनले उत्साह, भावना र उमंगबाट यस शिविरबाट फाइदा सबै पशुपालक किसानले लिनुपर्ने बताए ।
नगर उपप्रमुख सविना चौधरीले निःशुल्क शिविरबाट सेवा लिनुपर्नेमा जोड दिएकी थिइन् । शिविरले पशुपालक किसानलाई फाइदा हुने भएकोले यस शिविरलाई निरन्तरता दिनुपर्नेमा जोड दिइन् ।
मानिसमा बाँझोपनको समस्या देखिए चिकित्सकलाई देखाउने, अस्पताल लैजाने गरेपनि पशुमा भने अनभिज्ञ रहेको अवस्थाले किसानहरुले धेरै क्षति व्यहोर्नुपरिरहेको रामधुनी ८ का वडाध्यक्ष रुद्रबहादुर बस्नेतले बताए । आउने दिनहरुमा यस्ता कार्यक्रमहरुले पशु चौपायाहरुमा पनि विभिन्न रोगले किसानमा क्षति हुन्छ र यस्तो क्षतिबाट बच्न पशुको स्वास्थ्यमा पनि ध्यान दिनुपर्ने यस कार्यक्रमले सन्देश दिएको उनको भनाई थियो ।
नेपाल पाराभेटेरीनरी एण्ड लाइभस्टक एसोसिएसनका केन्द्रीय अध्यक्ष रामप्रसाद मेहताले २०४७ सालदेखि नै आन्दोलन गरेर पशुपालक किसानहरुको हक अधिकार प्राप्तिका लागि आफूहरु लागि परेको बताए । किसानलाई आत्मनिर्भर बनाउन लागि परेको बताउँदै मेहताले स्थानीय तहले पनि यस क्षेत्रमा बजेट बिनियोजन गरी कार्यक्रमहरुलाई प्रभावकारी ढंगले अघि बढाउनुपर्नेमा जोड दिए ।
रामधुनी नगरपालिकाका नगरप्रमुख चौधरीले ब्यानरमा लेखिएका अक्षर वाचन गरेर कार्यक्रम उद्घाटन गरेका थिए । कार्यक्रममा रामधुनीका उपप्रमुख सविना चौधरी, रामधुनी ८ का वडाध्यक्ष रुद्रबहादुर बस्नेत, ९ का वडाध्यक्ष घनश्याम चौधरी, एसोसिएसनका केन्दीय अध्यक्ष रामप्रसाद मेहता, डा.लेखराज दाहाल, डा संजय कुमार यादव, वडा सदस्य पुष्पलाल चौधरी, गीता शर्मा, शान्ति थरुनी लगायत सरोकारवालाहरुको उपस्थिती थियो ।
सो शिविरमा सात सय भन्दा बढी पशुलाई उपचार तथा परीक्षण गरिएको थियो ।
याे पनि : रामधुनी ८ मा पशु बीमा कार्यक्रम सुरु
