रामधुनी । सुनसरीको रामधुनीका आशिष प्याकुरेललाई ललितपुर जिल्ला अदालतले पूर्पक्षका लागि जेल चलान गरेको छ । नक्कली सेनिटाइजर उत्पादनको आरोपमा पक्राउ परेका प्याकुरेलमाथि अनुसन्धान गर्ने क्रममा राजस्व समेत छली गरेको पाइएपछि शुक्रबार अदालतले उनलाई पूर्पक्षका लागि कारागार चलान गरेको हो ।
प्याकुरेललाई ललितपुर जिल्ला अदालतले थुनछेक बहसबाट पूर्पक्षका लागि जेल चलान गरेको हो ।
सुनसरीको रामधुनी नगरपालिका वडा नं. १ घर भएका २६ वर्षीय प्याकुरेललाई गुणस्तरहीन ह्याण्ड सेनिटाइजर उत्पादन गरी बिक्री वितरण गरेको पुष्टि भएपछि ललितपुर महालक्ष्मी नगरपालिका वडा नं. ४ बाट प्रहरीले गत जेठ ९ गते पक्राउ गरेको थियो । पक्राउपछि अनुसन्धानको क्रममा राजस्व समेत छली गरेको पाइएको प्रहरीले जनाएको छ ।
प्याकुरेलले उत्पादन गरेको सेनिटाइजर औषधि व्यवस्था विभागको ल्याबमा परीक्षण गर्दा २२ प्रतिशतसम्म मानव स्वास्थ्यका लागि हानिकारक मिथानोल अल्कोहल प्रयोग भएको पुष्टि भएपछि उनलाई पक्राउ गरेको थियो ।
उत्पादित सेनिटाइजर ल्याब टेष्ट गर्दा स्वास्थ्यका लागि अत्यन्तै हानिकारक र विशाक्त पाइएको महानगरीय प्रहरी परिसर ललितपुरका प्रमुख किरण बज्राचार्यले जानकारी दिए । उनका अनुसार प्याकुरेलले लाइफ–लाइन ड्रप प्रा. लि. नामको कम्पनी चलाउदै आएका थिए ।
राजस्व कर छली गरेकाले थप अनुसन्धान गर्नुपर्ने भएकाले थप अनुसन्धान तथा कारबाहीको लागि पूर्पक्षका लागि जेल चलान गरिएको बज्राचार्यले बताए ।
