बराहक्षेत्र । सुनसरीको बराहक्षेत्रबाट प्रहरीले एक सय २५ केजी गाँजासहित दुईजनालाई पक्राउ गरेको छ । इलाका प्रहरी कार्यालय महेन्द्रनगरले गाँजा बोकेको गाडीसहित २ जनालाई पक्राउ गरी मंगलबार सार्वजनिक गरेको हो ।
बराहक्षेत्र नगरपालिका वडा नं.१ चतराबाट सप्तकोशी बाँध हुँदै प्रकाशपुर तिर लैजाने क्रममा बराहक्षेत्र नगरपालिका वडा नम्बर ८ शुक्रबारेमा प्रहरीले एक सय २५ केजी गाँजा, गाँजा बोकेको गाडी, एक थान मोबाइल र एक थान नक्कली पेस्तोल सहित २ जनालाई पक्राउ गरेको हो ।
पक्राउ पर्नेमा बराहक्षेत्र नगरपालिका वडा नं.६ चक्रघट्टी बसपार्क बस्ने २३ को भुपेन राय र रामधुनी नगरपालिका वडा नं.७ चौसठी बिघा बस्ने वर्ष २५ को अमिर लिम्बुलाई ईलाका कार्यालय महेन्द्रनगरको टोलीले पक्राउ गरेको प्रमुख पाण्डव राजवंशीले वताए ।
गएराति करिब १ बजे टोलीले बिशेष सूचनाको आधारमा चतराबाट आइरहेको को २ च ११२ नम्बरको मारुती भेन र को २९ प ३५०२ नम्बरको मोटरसाइकललाई नियन्त्रणमा लिई चेक गर्ने क्रममा भेनबाट लागूऔषध गाँजा एक सय २५ के.जि र सिटमा राखिएको अवस्था १ थान नक्कली रिवलबल पेस्तोल फेला परेको राजवंशीले बताए । उनका अनुसार घटनाका विषयमा थप अनुसन्धान भइरहेको छ ।
उक्त गाजा करिब २२ लाख ५० हजार रुपैयाँ बराबरको मूल्य रहेको समेत प्रहरीले जनाएको छ ।
