इटहरी । इटहरीको इतिहासका विभिन्न पक्षबारे उजागर गरिएको पुस्तक इतिहासमा इटहरी विमोचन गरिएको छ । नेप्ली मिडिया प्रा.लि.ले प्रकाशन गरेको पुस्तकलाई इटहरीका विभिन्न क्षेत्रका ऐतिहासिक व्यक्तिहरुको उपस्थितिमा विमोचन गरिएको हो ।
इटहरीका पहिलो मन्त्री रामकुमार सुब्बा, पहिलो मेयर तथा वर्तमान प्रदेश सांसद सर्वध्वज साँवा, मेयर द्वारिकलाल चौधरी, इटहरीका पहिलो फिल्म निर्माता हेमनारायण चौधरी र इटहरीका पहिलो स्कुल सञ्चालक डेबिट सुब्बाले संयुक्त रुपमा पुस्तक विमोचन गरेका थिए ।
तीन सय ३६ पृष्ठको उक्त पुस्तकमा इटहरीको कला, संगीत, साहित्य, व्यापार, शिक्षा, स्वास्थ्य, खेलकुद लगायत विभिन्न विषयसँग सम्बन्धित ऐतिहासिक घटनाक्रमहरु समावेश गरिएको छ । वर्तमान अवस्थाका साथै इटहरीको भावि सम्भावनाहरुसमेत पुस्तकले उजागर गरेको छ ।
कार्यक्रमका अवसरमा इटहरीको इतिहासलाई उजागर गर्ने, अभिलेखन गर्ने र विभिन्न समयमा प्रकाशन गर्ने तीन जना व्यक्तित्वहरुलाई सम्मान गरिएको थियो । अग्रज पत्रकार कृष्णविनोद लम्साल, अग्रज पत्रकार तथा राजनीतिज्ञ रमेश विष्ट र संगीतकर्मी तथा सामाजिक अभियानकर्मी राजु केसी सम्मानित भएका छन् । तीनै जना इटहरीको इतिहासलाई खोज गरी उजागर गर्ने कार्यमा लामो समयदेखि सक्रिय छन् ।
विमोचन कार्यक्रममा बोल्दै पूर्वमन्त्री कुमार सुब्बाले पुस्तकले भविष्यको लागि अझ दायित्व थपेको बताए । उनले अझ परिस्कृत गर्दै आगामी संस्करण प्रकाशन गर्न सुझाव दिए । उनले इटहरीको ऐतिहासिक घटनाबारे समेत बताएका थिए ।
यस्तै, प्रदेश सांसद सर्वध्वज साँवाले इटहरीको लागि महत्वपूर्ण पुस्तक प्रकाशन भएको र यसले धेरै विषय समेटेको बताउँदै कुनै विषय छुटेका भए पुनर्लेखन गरेर समेट्न सुझाव दिए ।
यस्तै, इटहरीका मेयर द्वारिकलाल चौधरीले पुस्तक प्रकाशन हुनु ऐतिहासिक उपलब्धी भएको बताए । इटहरी बन्नमा सबैको योगदान रहेको किताबमा समेटिएको बताउँदै उनले इटहरीका विभिन्न स्थानहरुको नामाकरणबारे चर्चा गरेका थिए ।
कार्यक्रममा नेप्ली मिडिया प्रालिका निर्देशक, पुस्तकका संकलक तथा सम्पादक हिमाल दाहालले पाँच वर्षको तयारीमा पुस्तक प्रकाशन भएको बताए । उनका अनुसार एक संस्था वा व्यक्तिबाट उक्त पुस्तक तयार हुन नसक्ने र धेरै जनाको संस्मरण रहेको छ ।
