बराहक्षेत्र । सुनसरीको बराहक्षेत्र नगरपालिकाबाट लागूऔषध ब्राउनसुगरसहित ५ जना पक्राउ परेका छन् । आइतबार साँझ बराहक्षेत्र ३ बाङ्गे नडाह सडकको मोरंङ सुनसरी सिचाई आयोजना नहर छेउमा मोटरसाईकल रोकी चेक गर्ने क्रममा प्रहरीले बराहक्षेत्र ६ बस्ने पुरुषोतम मेहताको साथबाट ७ ग्राम ४३० मिलिग्राम लागूऔषध खैरो हिरोईन (ब्राउनसुगर) फेला पारेको छ ।
प्रदेश १ प्रहरी कार्यालय विराटनगर र इलाका प्रहरी कार्यालय महेन्द्रनगरबाट खटिएको टोलिले विशेष सूचनाको आधारमा बाङ्गे नडाह सडकमा प्र.१-०२-०४४ प ४५५६ र प. १-०२-०४२ प ४२२९ नम्वरको मोटरसाईकललाई चेक गर्दा सो लागूऔषध फेला पारेको हो ।
मोटरसाईकलमा सवार अन्य सोहि स्थान बस्ने वर्ष २९ को विशाल वस्नेत, बराहक्षेत्र ९ बस्ने २८ वर्षको पाथे चन्द्रवंशी, वर्ष २८ को जयन्त माईलासमेत पक्राउ परेका छन् । प्रहरीले उनीहरुलाई लागूऔषध नियन्त्रण ऐन २०३३ बमोजिम निजहरुलाई सुनसरी जिल्ला अदालतबाट ७ दिनको म्याद थप अनुमती लिई इलाका प्रहरी कार्यालय महेन्द्रनगरबाट थप अनुसन्धान भइरहेको प्रहरीले जनाएको छ । प्रहरीले मोटरसाइकल समेत नियन्त्रणमा लिएको छ ।
पक्राउ परेकाहरुले दिएको सूचनाको आधारमा भारतको सुपौल जिल्ला थाना बिरपुर बनेलीपट्टी ३ बस्ने वर्ष २५ को रुद्रनारायण कुमार यादवलाई सुनसरीको बराहक्षेत्र ८ शुक्रबारेबाट सोमबार साँझ पक्राउ गरी खानतलासी गर्दा निजको साथबाट ५२ ग्राम अवैध लागूऔषध ब्राउनसुगर र भारतीय नम्बर प्लेट बीअर ५० के ०३८६ को निलो रङको अपाची मोटरसाईकल समेत नियन्त्रणमा लिएको प्रहरीले जनाएको छ ।
उनलाई सोधपुछ गर्दा भाद्र ६ गते पक्राउ परेका पुरुषोतम मेहताको घरकोठामा लागूऔषध (ब्राउन सुगर) लुकाई छिपाई राखेको छ भन्ने जानकारी गराएका थिए । सो पश्चात प्रहरी टोलिले मेहताको घरकोठा खानतलसी गर्ने क्रममा थप १७ ग्राम अवैध लागुऔषध खैरो हिरोईन (ब्राउन सुगर) फेला परेकोले सो समेत बरामद गरी उक्त लागूऔषधको जम्मा परिमाण ७६ ग्राम ४३० मिलिग्राम भएको र उनीहरुको विषयमा अनुसन्धान जारी रहेको इलाका प्रहरी कार्यालय महेन्द्रनगरले जनाएको छ ।
