रामधुनी । सुनसरीको रामधुनी नगरपालिका बालमैत्री स्थानीय शासन नगर घोषित भएको छ । राष्ट्रिय बालदिवसको अवसरमा मंगलबार एक कार्यक्रम बीच नगरलाई बालमैत्री स्थानीय शासन नगर घोषणा गरिएको हो ।
बालबचाउ, बालसंरक्षण, बालविकास र अर्थपूर्ण बालसहभागितालाई स्थानीय तहको नीति, संरचना, कार्यप्रक्रिया प्रणाली र व्यवहारमा संस्थागत गरेर नगरपालिकाले ऐतिहासिक उपलब्धि प्राप्त गरेको घोषणा कार्यक्रमका प्रमुख अतिथि प्रदेश १ का सामाजिक विकास मन्त्रि बलबहादुर साम्सोहाङले बताए । प्रदेश १ को दोस्रो र जिल्लाको पहिलो बालमैत्री स्थानीय शासन नगरपालिकाको रुपमा स्थापित भएको अवसरमा मन्त्रि साम्सोहाङले बधाई दिँदै प्रदेश सरकारबाट बालमैत्रीका लागि थप सहयोग रहने बताए ।
नगरपालिकाका सबै वार्डका बाल क्लबसहित बालमैत्री नगर प्रचारप्रसार समिति, बाल अभियानकर्ता, शिक्षकलगायतले केही वर्षयता नगरका सबै वार्ड र नगरलाई बालमैत्री बनाउन विभिन्न क्रियाकलाप, कार्यक्रम तथा अभियान सञ्चालन गरेको थियो ।
बालअधिकारकर्मी, सरोकारवाला र बालबालिकाको प्रत्यक्ष सहभागिताले लामो संघर्ष पश्चात बालमैत्री नगर प्राप्त गरेकोमा टिकाई राख्न पनि सहयोगी हातहरुको भूमिका हुने नगर उपप्रमुख सविना चौधरीले अनुरोध गरिन् ।
नगरप्रमुख जयप्रकाश चौधरीले नेपाल सरकारको मापदण्डको आधारमा तयार भएको बालमैत्री स्थानीय शासन घोषणा गर्न आवश्यक ३९ र नगरले थप गरेको एउटा गरी जम्मा ४० ओटा सूचक रहेको बताए । उनले ४० मध्ये १९ ओटा सूचकहरु १०० प्रतिशत र २२ ओटा सूचकहरु ९९.७७ प्रतिशतसम्म नतिजा हांसिल गर्दै बालमैत्री नगर घोषणा गर्न सफल भएको बताए ।
बालमैत्री घोषणासँगै नगरपालिकाको नयाँ भवन समेत उद्घाटन गरिएको छ । रामधुनी वडा नं. ३ सिंगियामा रहेको नयाँ भवन मन्त्रि साम्सोहाङले उद्घाट गरे ।
