बराहक्षेत्र । केही दिन अगाडिको निरन्तर वर्षा र बाढीबाट प्रभावित २ सय परिवारलाई खाद्यान्न उपलब्ध गराइएको छ ।
दैनिकि ज्यालादारीमा काम गर्दै गुजारा गरिरहेका परिवारलाई वर्षाले समस्यामा पारेपछि बराहक्षेत्र नगरपालिका वडा नं ८ पुलाहाका युवा भीम कट्वालको संयोजनमा बराहक्षेत्र र रामधुनीका २ सय परिवारलाई सहयोग स्वरुप खाद्यान्न प्रदान गरिएको हो ।
पोखरा, चितवन र सुनसरीका केही सहयोगी व्यक्तिहरुसँगको सहयोग र समन्वयमा बराहक्षेत्र नगरपालिकाको वडा नं ४, ६, ७, ८, ९, १० र ११ र रामधुनीको वडा नं ४ मा रहेका बाढी प्रभावित परिवारलाई चामल, दाल, नुन, चाउचाउ, दाल लगायतका खाद्य सामाग्री प्रदान गरेको राहत कार्यक्रमका संयोजक कट्वालले बताए ।
नेपाली कांग्रेसका क्षेत्रीय प्रतिनिधि समेत रहेका कट्वालले राहत सामाग्री वडा सभापति एवम् नेताहरुको समन्वयमा वितगरण गरिएको थियो । बाढीले अत्ति बिपन्न परिवारको चुल्हो बाल्ने अवस्था नै नभएकाले केही सहयोगी साथीहरुको सहयोगमा खाद्यान्न प्रदान गरेको कट्वालले बताए ।
राहत वितरण कार्यक्रममा नेपाली कांग्रेसका बराहक्षेत्र नगर सभापति रमेश कार्की, जिल्ला सदस्य शंकर बस्नेत, राई संघ सुनसरी सभापति सन्त राई, तरुण दल सुनसरी उपसभापति रोहित सुब्बा लगाएतका नेताहरुको उपस्थिति रहेको थियो ।
