रामधुनी । सुनसरीको रामधुनी ८ बाँधडाडाँमा निर्माणाधिन प्याब्सन बस्ती निर्माणको अन्तिम चरणमा पुगेको छ । निजि आवासीय विद्यालय अर्गनाइजेशन (प्याब्सन) केन्द्रीय समितिको सहयोगमा निर्माणाधिन बस्तीको करिब ८० प्रतिशत काम सकिएको जिल्ला सहसचिव गोपाल निरौलाले जानकारी दिए ।
सो बस्तीमा २५ वटा घर निर्माण भइसकेको छ । बीचमा माटो हालेर खाल्डो पुर्ने काम भइरहेको छ । रंगरोगन, बाटो, आँगन, बगैंचा निर्माण, कलधारा जडान लगायतका केही काम बाँकी रहेको निरौलाले बताए ।
वडामा रहेका सुकुम्बासी तथा विपन्न परिवार पहिचान गरी सो बस्ती हस्तान्तरण गरिने रामधुनी ८ का वार्ड अध्यक्ष रुद्र बस्नेतले बताए । बाँकी रहेका काममा पनि वार्डले प्याब्सनसँग सहकार्य गरी केही सहयोग गर्ने उनले बताए । सो प्याब्सन बस्तीलाई व्यवस्थित बनाउनका लागि सबै परिवाललाई लागूहुनेगरी आचारसंहिता समेत निर्माण गर्ने उनको भनाइ छ ।
बस्तीमा माटो, धारा, बिजुली, जग्गालगायतमा वार्ड कार्यालयले सहयोग गरेको छ ।
केन्द्रीय अध्यक्ष पुरीद्वारा अवलोकन
प्याब्सनका केन्द्रीय अध्यक्ष टिकाराम पुरीले आइतबार सो बस्तीको अवलोकन गरेका छन् । अवलोकनमा पुरीसहित केन्द्रीय उपा नारायण घिमिरेसमेत रहेका थिए । पुरीले निर्माण पुरा भई बाँकी रहेका सबै काम चाँडै सक्न निर्देशन दिएका छन् । पुरीले प्रदेश १, जिल्ला, नगरसमितिका पदाधिकारीसहित वार्ड अध्यक्ष बस्नेतसँग समेत छलफल गरी एकआपसमा समन्वय गरी बाँकी काम सक्न निर्देशन दिएका हुन् ।
अवलोकनमा प्याब्सन प्रदेश १ का बरिष्ठ उपाध्यक्ष सुमित थापा, प्रदेश उपाध्यक्ष ज्ञानेन्द्र दाहाल, प्रदेश सचिव कोषराज प्याकुरेल, सहसचिव विष्णु कोइराला, जिल्ला उपाध्यक्ष रमेश कार्की, जिल्ला सहसचिव गोपाल निरौला, रामधुनी ८ का वार्डअध्यक्ष बस्नेतलगायतको उपस्थिति रहेको थियो ।
फागुनको दोस्रो हप्तासम्ममा २५ परिवारलाई घर हस्तान्तरण गर्ने योजना रहेको प्याब्सनले जनाएको छ ।
