इटहरी नमुना कलेजले आज १६ औं विश्व सामाजिक कार्य दिवसको अवसरमा रक्तदान कार्यक्रम आयोजना गरेको छ । कलेजको सामाजिक कार्य विभागले सुनसरी रेडक्रस सोसाइटीसँगको समन्वयनमा उक्त कार्यक्रम आयोजना गरेको हो ।
मंगलबार कलेज परिसरमा आयोजित कार्यक्रममा शिक्षक र विभिन्न संकायमा अध्ययनरत विद्यार्थीहरुको सहभागिताबाट ५७ पिन्ट रगत संकललन गरिएको समाज कार्य विभागका प्रमुख शैलेन्द्र राईले जानकारी दिए । साथै उनले मार्च महिना सामाजिक कार्यकर्ताहरुका लागि विशेष रहेको र विगतदेखि नै कलेजले यस किसिमका कार्यक्रमलाई निरन्तरता दिँदै आएको बताए । कार्यक्रमले विद्यार्थीबीच आपसी सहकार्य र उनीहरुको नेतृत्व विकासमा समेत सहयोग पुग्ने उनले विश्वास व्यक्त गरे ।
आगामी योजनाबारे जानकारी दिँदै समाज कार्य विभागका संयोजक निराजन पाण्डेले मार्च महिनामै समाज कार्य अध्ययनरत विद्यार्थीहरुको सक्रिय सहभागितामा अन्य सामाजिक कामहरु समेत गर्दै यस दिवसलाई सार्थकता दिइने बताए ।
कलेजले स्थापना कालदेखि नै विभिन्न क्षेत्रमा सामाजिक कामहरु गर्दै आएको छ । सबैलाई समेटौँ ः नवीन पर्यावरणीय सामाजिक विश्वको सहनिर्माण गरौँ” भन्ने अन्तर्राष्ट्रिय नाराका साथ आज विश्वभर विभिन्न कार्यक्रम गर्दै यो दिवस मनाइएको छ ।
