रामधुनी । नेपाल रेडक्रस सोसाइटी उपशाखा डुम्राहाद्वारा आयोजित रक्तदान कार्यक्रममा २२ पिन्ट रगत संकलन भएको छ । झुम्का जेसीज र साइ मेडिकल हल झुम्काको समन्वयमा शनिबार रामधुनी ८ डुम्राहाथित रेडक्रस सोसाइटी उपशाखाको भवनमा रक्तदान आयोजना गरिएको थियो ।
ग्रामीण क्षेत्रमा समेत सामाजिक कार्यक्रम गर्दै जेसीजको उपस्थिती जनाउन रक्तदान कार्यक्रममा समन्वय गरिएको झुम्का जेसीजका अध्यक्ष द्वारिका घिमिरे (सुबोध)ले जानकारी गराए । पछिल्लो समय बढ्दो रगत अभावलाई मध्यनजर गरी रक्तदान कार्यक्रम आयोजना गरिएको रेडक्रस सोसाइटी उपशाखा डुम्राहाका सभापति हेमराज विष्टले बताए ।
झुम्का जेसीजले आफ्नो वार्षिकोत्सवको अवसरमा सो कार्यक्रममा समन्वय गरेको हो । रक्तदान कार्यक्रममा रामधुनी ८ का अध्यक्ष रुद्र बस्नेत, रामधुनी ९ का अध्यक्ष घनश्याम चौधरी, रामधुनी ५ का डेगराज फुयाँल, साइ मेडिकल हलका सञ्चालक दुर्गा फुयाँलको उपस्थिती रहेको थियो ।
रक्तदान कार्यक्रमलाई नेपाल रेडक्रस सोसाइटी सुनसरीले प्राविधिक सहयोग गरेको थियो ।
