रामधुनी । सुनसरीकाे रामधुनी ८ बाध डाँडामा निर्माण गरिएको एकीकृत नमुना प्याब्सन बस्ती हस्तान्तरण गरिएको छ । निजि तथा आवासीय विद्यालय अर्गनाइजेसन प्याब्सनको केन्द्रीय समितिले बिपन्न समुदाय तथा बाढी पीडितको स्थानान्तरणका लागि निर्माण गरेको नमुना बस्ती आइतबार हस्तान्तरण गरिएको हो ।
करिब एक करोड रुपैयाँको लागतमा निर्माण गरिएको एकीकृत नमुना बस्ती रामधुनी नगरपालिकाका मेयर जयप्रकाश चौधरी र प्याब्सन केन्द्रीय अध्यक्ष टिकाराम पुरीले संयुक्त रुपमा उदघाटन गरेका थिए । प्याब्सनको ड्रिम प्रजोक्टको रुपमा २०७६ सालदेखि बिपन्न समुदायलाई केन्द्रित गरेर बस्ती निर्माण सुरु गरेको प्याप्सन केन्द्रीय अध्यक्ष पुरीले बताए । यसको संरक्षणमा नगरपालिका र समुदायले सकारात्मक साथ दिनेमा आफू विश्वस्त रहेको पुरीले बताए ।
स्थानीय रञ्जित चौधरीलाई सांकेतिक रुपमा घरको चाबी प्रदान गरी घर हस्तान्तरण गरिएको छ । बाँकी घरहरु नगरपालिका, नगर प्याब्सन र वडा कार्यालयलाई प्रदान गरिएको छ । केही दिनपछि बाँकी घरहरुको चाबी प्रदान गरिने प्रदेश प्याब्सनले जनाएको छ ।
बस्ती उद्घाटन तथा हस्तान्तरण कार्यक्रमा बोल्दै रामधुनी नगरपालिकाका मेयर जयप्रकाश चौधरीले प्याप्सनको उदाहरणीय काममा नगरपालिकाको सदैव साथ र सहयोग रहने बताए । २५ वटा घर निर्माण गरिएको बस्तीमा बिजुली र पानीको समेत व्यवस्था गरिएको छ । कार्यक्रममा प्याब्सनका केन्द्रीय प्रतिनिधि, प्रदेश १ अध्यक्ष तथा विभिन्न जिल्लाका अध्यक्ष तथा प्रतिनिधिहरुको उपस्थिति रहेको थियो ।
