रामधुनी । सुनसरीको रामधुनी नगरपालिका वडा नम्बर ८ मा नव निर्वाचित जनप्रतिनिधिले पदभार ग्रहण गरेका छन् । गत वैशाख ३० मा भएको स्थानीय तहको निर्वाचनमा विजयी भई नगरप्रमुखसमेतबाट सपथ ग्रहण लिइसकेका नवनिर्वाचित जनप्रतिनिधिहरुले पदभार ग्रहण गरेका हुन् ।
बुधबार वडा कार्यालयस्थित कार्यकक्षमा एक कार्यक्रम गरी नयाँ जनप्रतिनिधिलाई पदभार ग्रहण र निवर्तमानलाई विदाई गरिएको थियो । नेपाल कम्युनिष्ट पार्टी एमालेका तर्फबाट वडाध्यक्षमा सुरेन्द्र सिंह खवास, वडासदस्यहरुमा पार्वती चौधरी, सरिता परियार, चन्द्रमान उरावँ र दान बहादुर खुलालले पदभार ग्रहण गरेका हुन् ।
निवर्तमान अध्यक्ष रुद्र बहादुर बस्नेतसहित वडा सदस्यहरुलाई भने विदाई गरिएको छ । पहिलो निर्वाचन पश्चात वडा कार्यालयमा विकास निर्माणका लागि कामहरु भएको निवर्तमान अध्यक्ष बस्नेतले बताए । उनले कतिपय कामहरुको डिपीआर भइसकेको, कतिपय कामका लागि प्रदेश र संघमा योजनामा समेत परेकोले ति कामहरुमा नवनिर्वाचित जनप्रतिनिधिहरुलाई निरन्तरता दिन आग्रह गरे ।
पदभार ग्रहण पश्चात वडाध्यक्ष सुरेन्द्र सिंह खवासले विकास निर्माणका कामलाई प्राथामिकता दिँदै काम गर्ने बताए । उनले आफू गतल बाटोमा नजाने बताउँदै कसैले गलत बाटोमा लैजाने हिसाबले काम नगर्न पनि अनुरोध गरे ।
बुधबार नै नयाँ जनप्रतिनिधिले वडा भित्रका गरिब, दलित, अपांगता भएका, पछाडि पारिएका प्राथामिक तहसम्म अध्ययनरत विद्यार्थीलाई प्रत्येक वर्ष पोशाक वितरण गर्ने निर्णय गरेका छन् । त्यसै गरी बुधबार नै वडा कार्यालय अगाडि रहेका पोखरीको डिपीआर गरी बाल उद्यान निर्माण गर्ने समेत निर्णय गरिएको छ ।
