सुनसरी । माताको भेषमा अनुयायीहरुलाई गठेको र कानुनद्वारा बर्जित अपमानजनक रुपमा भेदभाव गरेको आरोपमा आइतबार एक महिला इटहरीबाट पक्राउ परेकी छन् ।
विभिन्न व्यक्तिहरुलाई झारफुकको बहानामा गठी गरेको उजुरी पर्न थालेपछि ४० वर्षीया महिला लक्ष्मी रानामगरलाई पक्राउ गरिएको प्रहरी नायब उपरीक्षक खगेन्द्र बहादुर खड्काले बताए । उनका अनुसार तेह्रथुमको लसुने घर भई ५ वर्षदेखि इटहरी बस्दै आएकी रानामगरले करिब साढे दुई वर्षदेखि ठग्ने गरेकी थिइन् । ‘उनले ठगी गर्ने मात्र होइन, समाजमा विभिन्न व्यक्तिहरुलाई अपमानजन रुपमा बोक्सा बोक्सीको आरोप समेत लगाउने गरेको पाइएको छ,‘ उनले भने ‘समुदायमा विभिन्न भ्रम छर्नेदेखि त्रास उत्पन्न गराई पुजा गर्न पैसा तथा सुन चढाउनुपर्छ भन्दै ठग्ने गरेकी रहिछन् ।’
तेह्रथुमको लसुने घर भई इटहरी ४ मा बस्दै आएकी र निरन्तर स्थानीय तथा बाहिरका अनुयायीहरुलाई ठग्ने गरेको र जथाभावी रुपमा आरोप लगाउने गरेको पाइएको खड्काको भनाई छ । रानामगरलाई इलाका प्रहरी कार्यालय इटहरीमा राखि अनुसन्धान गरिरहेको उनले बताए ।
यसरी खुल्यो रहस्य
इटहरी ४ की ३४ वर्षीया एक महिलाका श्रीमान् ५ वर्ष वैदेशिक रोजगारी बाट फर्किए । फर्किएलगत्तै आर्थिक हिसाब मागेर मानसिक तनाब दिन थालेपछि उनी दुई छोरी र एक छोरासहित आत्महत्याका लागि हालफान्न शुक्रबार साँझ कोसी तिर गइन् । स्थानीयको सूचनापश्चात प्रहरीको टोलीले उनको उद्धार गर्यो । उद्धारपछि जिल्ला प्रहरी कार्यालय सुनसरी ल्याएर प्रहरीले सोधपुछ गर्दा ती महिलाले पैसा र सुन मातालाई चढाएको बताइन् । महिलासहित श्रीमान् इलाका प्रहरी कार्यालय इटहरीमा माताविरुद्ध जाहेरी दिए । त्यस लगत्तै अन्य जाहेरीहरु पर्न थालेपछि उनलाई पक्राउ गरिएको हो ।
हालसम्म चारजनाले दिए जाहेरी
माता भनिने मगरले विभिन्न व्यक्तिहरुलाई अनावश्यक आरोप लगाउने, रोग छ निको पार्न खर्च गर्नुपर्छ भन्दै लाखौं रुपैयाँ लिएको आरोपसहित चार जनाले जाहेरी दिएका छन् । १० लाख रुपैयाँ लिएको, ५० हजार रुपैयाँ गठेको, बोक्सा आरोप लगाएको लगायतका विषयमा उनी विरुद्ध जाहेरी परेको छ । ‘पीडित महिलाका श्रीमान्सहित अहिलेसम्म ४ जनाको जाहेरी परेको छ,’ प्रहरी नायब उपरिक्षक खड्काले भने, ‘समुदायमा धेरैलाई ठग्ने गरेकी रहिछिन् ।’
विभिन्न व्यक्तिहरुलाई बोक्साबोक्सीको आरोप लगाउने गरेको पाइएको प्रहरी नायब उपरिक्षक खड्काले बताए । आत्महत्या प्रयास गर्ने महिलाका श्रीमानले आफू वैदेशिक रोजगारमा हुँदा अपमानजनक रुपमा बोक्साको आरोप लगाएको, छोराको मृत्युहुन्छ भन्दै त्रास देखाएर श्रीमतीबाट सुन, पैसा, बोका चढाउन बाध्य पारेर ठगेको भन्दै जाहेरी दिएका हुन् । समुदायमा अन्य व्यक्तिहरुलाई समेत त्यस्तो आरोप लगाउने गरेको समुदायका व्यक्तिहरुलाई उदृत गर्दै खड्काले बताए ।
अभियुक्त रानामगरलाई हाल भेदभाव तथा अपमानजनक व्यवहार मुद्दा अन्तर्गत अनुसन्धान गरिरहेको खड्काले जनाए । घटनाको प्रकृति अनुसार ठगी कसुर समेत आकर्षित हुन सक्ने उनको भनाई छ ।
