रामधुनी । सुनसरीको रामधुनीमा निःशुल्क स्वास्थ्य शिविर बुधबार (आज) सञ्चालन गरिएको छ । लायन्स क्लब अफ रामधुनी सिटी र लियो क्लब अफ रामधुनी सिटीको आयोजना तथा लियन्स क्लब अफ रामधुनी र लियो क्लब अफ रामधुनीको सहजीकरणमा उक्त शिविर सञ्चालन गरिएको हो ।
शिविरमा तिरगंगा आँखा प्रतिष्ठान तथा रामलाल गोल्छ आँखा अस्पताल प्रतिष्ठानका वरिष्ठ विशेषज्ञहरुको सेवा प्रदान गरिएको थियो ।
उक्त शिविरमा दृष्टि जाँच, आँखाको पर्दाको निःशुल्क फोटो खिचिने साथै उक्त फोटोको विशेषज्ञ डाक्टरद्वारा जाँच गरी उपचार गरिएको लियो क्लब अफ रामधुनी सिटीका अध्यक्ष रोसन घिमिरेले जानकारी दिए ।
मधुमेह भएका व्यक्तिहरुलाई विशेष प्राथमिक्ता राखेर सञ्चालन गरिएको शिविरमा अन्य आँखा सम्बन्धी समस्या भएका सेवाग्राहीलाई पनि सेवा प्रदान गरिएको लायन्स क्लब अफ रामधुनी सिटीका अध्यक्ष रमेश घिमिरेले जानकारी दिए । उनका अनुसार शिविरमा डेढ सय भन्दा बढी सेवाग्राहीहरुलाई सेवा प्रदान गरिएको थियाे ।
साथै आगामी दिनहरुमा समेत यी र यस्ता शिविरहरु सञ्चालन गर्दै जाने साथै आम जनमानसमा सेवामुखी बन्दै सेवा प्रदान गरिने प्रतिबद्धता लिएकाे आयोजकले जनाएकाे छ ।
उक्त शिविर साई हस्पिटलमा सञ्चालन गरिएको थियो ।
