विवादित नेपाल टी-२० लिगको लागि सबै कानुनी प्रक्रिया अन्तिम चरणमा पुगेको दाबी गरिएको छ।
नेपाल क्रिकेट संघ (क्यान) र आयोजनाको जिम्मा पाएको भारतको सेभेन थ्री स्पोट्सले विदेशी खेलाडीको श्रम स्वीकृती अन्तिम चरणमा पुगेको शुक्रबार पत्रकार सम्मेलन गरेर दाबी गरेका हुन्।
क्यान अध्यक्ष चतुरबहादुर चन्द र सेभेन-थ्री स्पोर्ट्सका कार्यकारी निर्देशक जतिन अह्लुवालियाले सबै कानुनी प्रक्रिया अन्तिम चरणमा पुगेको दाबी गर्दै शनिबारदेखि कीर्तिपुरस्थित त्रिवि मैदानमा लिग सञ्चालन हुने बताए। साथै दुवै जनाले नेपाल टी-२० लिगलाई रोक्न चौतर्फी अवरोध भए पनि आफूहरु नेपाली क्रिकेटको विकासका लागि अघि बढेको बताए।
पटकपटक सार्दै आएको नेपाल टी-२० लिग आगामी शनिबारदेखि हुन लागेको हो। लिगमा काठमाडौं नाइट्स, पोखरा एभेन्जर्स, विराटनगर सुपरकिंग्स, लुम्बिनी अलस्टार्स, जनकपुर रोयल्स र फार वेस्ट युनाइटेड गरी ६ वटा फ्रेञ्चाइज टिमले भाग लिँदैछन्।
शुक्रबार लिगको विजेताको पुरस्कार रकम पनि सार्वजनिक गरिएको छ। विजेताले ५५ लाख रुपैयाँ प्राप्त गर्नेछन्। उपविजेतालाई ३० लाख रुपैयाँ, तेस्रो स्थान हात पार्नेलाई १० लाख र चौथो हुनेलाई ५ लाख रुपैयाँ दिइनेछ।
यस्तै प्लेयर अफ दि सिरिजलाई ५ लाख तथा उत्कृष्ट बलर र ब्याटरलाई जनही २ लाख ५० हजार रूपैयाँ प्रदान गरिनेछ। प्रत्येक खेलको प्लेयर अफ दि म्याचलाई ४० हजार र इमर्जिङ प्लेयरलाई १ लाख ८० हजार रूपैयाँ प्राप्त गर्नेछ।
लिगको मुख्य प्रायोजक वान एक्स ब्याट रहेको सेभेन स्पोर्ट्सका जतिनले बताए।
वान एक्स बेटिङ कम्पनीसँग नाम मिल्दो मुख्य प्रायोजकको सम्बन्धको विषयमा प्रश्न गर्दा जतिनले ‘वान एक्स बेट र वान एक्स ब्याट’ फरक कम्पनी भएको र वान एक्स ब्याट आइसिसीबाट मान्यता प्राप्त कम्पनी भएको दाबी गरे। तर वान एक्स ब्याटको कुनै आधिकारीक वेभ साइट र तथ्य इन्टरनेटमा प्राप्त छैन।
प्रतियोगिताका खेलहरु युरो स्पोर्ट्स र फ्यान कोडबाट लाइभ हुने जतिनले बताए। त्यसका लागि भिडिओ उत्पादन टिम भारतबाट काठमाडौंमा आइसकेको छ।
यता सेभेन थ्री स्पोर्ट्स नेपालमा दर्ता भएको छ। कम्पनी रजिस्टारको कार्यालयमा सेभेन थ्री स्पोर्ट्स बिहीबार ३०४१०१ नम्बरमा दर्ता भएको स्रोतको दाबी छ। कम्पनीमा जतिन अह्लुवालियासहित सपना अह्लुवालिया र सन्दीप सिंह बागा रहेका छन्। यसअघि विदेशी कम्पनीको शाखाको रुपमा दर्ता गर्न कार्यालयमा निवेदन दिइएको थियो।
यस्तै विराटनगर सुपरकिंग्सका लागि डाइमन्ड डिजिक्याप स्पोर्ट्स प्रालि ३०४१०५ नम्बरमा दर्ता भएको छ। कम्पनीमा विराटनगरका टिम मालिक राकेश कुमार गुप्तासहित ममता खण्डेवाल, दीपक खण्डेवाल, शिखा धमानी, पूजा यादव र चन्दर शेखर शर्मा छन्।
यस्तै जनकपुर रोयल्सका टिम मालिक गोविन्द खण्डेवाल र सुनिल सोनीको नाममा गोल्ड स्पोर्टस प्रालि ३०४१०३ नम्बरमा दर्ता भएको छ।
नेपालमा दर्ता गर्नुअघि सेभेन थ्री स्पोर्ट्सले आफ्नो कम्पनीको प्रवन्ध पत्रमा बेटिङ गर्ने उद्देश्य राखेको थियो। नेपालमा गैरकानुनी हुँदाहुँदै पनि बेटिङ गर्ने उद्देश्य बोकेको कम्पनी दर्ताका लागि निवेदन आएपछि खेलकुद परिषद्को कानुन शाखाले शंका गरेको थियो।
