इटहरी । इटहरी २० तरहरामा रहेको तरहरा मोडेल एकेडेमीले दुई दिने सिकाई अभिमुखीकरण कार्यक्रम सम्पन्न गरेको छ । शैक्षिक क्षेत्रको गुणस्तर वृद्धि र कक्षाकोठामा हुने पठनपाठनलाई व्यवस्थित तथा प्रभावकारी बनाउने उद्देश्यले स्कुलले अभिमुखीकरण तथा कार्यशाला सम्पन्न गरेको हो ।
विद्यालयको सभाहलमै आयोजित कार्यक्रममा इटहरी नमुना कलेज, सामाजिक कार्य विभागका प्रमुख नितेश गौतम र इटहरी नमुना कलेजकी दुर्गा देवी काफ्लेले सहजीकरण गर्नुभएको थियो । दुई दिनको अभिमुखीकरण र कार्यशालामा सहजकर्ता द्वयले कक्षा कोठामा कसरी व्यवस्थित सिकाई प्रणाली अभ्यास गर्ने, सिकाई पद्धति के कस्ता छन्, कसरी प्रस्तुत हुने लगायतका विषयमा सहजीकरण गर्नुभएको थियो ।
आजको समयमा नयाँ विधि र पद्धतिलाई अवलम्बन गर्दै प्रभावकारी रुपमा कक्षामा विद्यार्थीलाई सिकाउनुपर्ने आवश्यकता रहेकोले यो कार्यक्रम आयोजना गरिएको स्कुलका प्रधानाध्यापक घनश्याम रिमालले बताउनुभयो ।
कक्षामा प्रभावकारी रुपमा सिकाउन नयाँ नयाँ विधिको प्रयोग गर्दा अझ प्रभावकारी बन्ने सहजकर्ता गौतमले जानकारी दिनुभयाे । अभिमुखीकरण तथा कार्यशाला विद्यालय व्यस्थापन समितिका अध्यक्ष सन्तोष श्रेष्ठको अध्यक्षतामा सम्पन्न भएको थियो । १८ जना शिक्षकशिक्षिकाहरुको सहभागिता रहेको सो कार्यक्रममा प्रयोगात्मक अभ्यास (कार्यशाला) समेत गरिएको थियो ।
