इटहरी । पूर्वान्चल इन्स्टिच्युट अफ फिल्म एन्ड टेलिभिजन ‘पिफ्ट’को अध्यक्षमा कलाकार तथा निर्देशक दीपाश्री निरौला नियुक्त भएकी छिन् ।
सोमबार इटहरीस्थित इन्स्टिच्युटकै सभाहलमा एक कार्यक्रमका बिच निरौलालाई अध्यक्षमा नियुक्त गरिएको हो । सोही कार्यक्रम मार्फत चलचित्र विकास बोर्डका पूर्व अध्यक्ष राजकुमार राईलाई इन्स्टिच्युटको संरक्षकको रूपमा राखिएको छ । त्यस्तै सल्लाहकार समितिको वरिष्ठ सल्लाहकारमा निर्देशक तथा फिल्मकर्मी महासंघ प्रदेश १ का अध्यक्ष अरुण कुमार प्रधानलाई चयन गरिएको छ । महासंघ महासचिव तथा अभिनेता दिनेश कोइराला र महासंघ उपाध्यक्ष प्रकाश सुब्बालाई पनि सल्लाहकार समितिमा चयन गरिएको छ ।
कार्यक्रममा आफ्नै ठाउँमा यसरी अध्यक्ष जस्तो पदमा बस्न पाउँदा आफूलाई खुसी लागेको निरौलाले बताइन् । आफ्नै ठाउँमा फिल्म पढ्न पाउने कलेज खुलेकोमा उनले प्रशंसा व्यक्त गरिन् । ‘मलाई अभिभावक बनाउनु भएको छ, मैले भन्दा पनि हाम्रो भन्ने भावले काम गरौं, ‘उनले भनिन् ‘अब म पनि तपाईहरुसँगै छु ।’
त्यस्तै कार्यक्रमको प्रमुख अतिथिको रूपमा रहेका फिल्म निर्माता तथा अभिनेता दीपक राज गिरीले पनि कलेज तथा दिपालाई बधाई दिएका छन् । उनले सबैकामका लागि काठमाडौंमात्र केन्द्रित हुनुपरेको अवस्थामा काठमाडौं बाहिर पनि यस्ता खालका चलचित्र अध्ययापन हुने खालका कलेज, प्रशिक्षण केन्द्र खुल्नु आवश्यक रहेको बताए ।
इन्स्टिच्युटले अहिले विभिन्न सर्ट मुभीहरू पनि निर्माण गरिरहेको छ । त्यस्तै नृत्यको कक्षा समेत सञ्चालन गरिरहेको इन्स्टिच्युटमा फिल्म मेकिङसँगै डिरेक्सन, स्क्रिप्ट राईटिङ, सिनेमाटोग्राफी, अभिनय, एडिटिङ लगायतका कोर्सहरू अध्ययापन गराइरहेको संचालक रोनिश राउतले जानकारी दिए ।
