फूल, बत्ती तथा भाइ–चेलीको सम्बन्धको पर्व तिहारको रौनक अहिले अधिकांशको घरमा छ। तिहारको रौनक सुनसरीको मुख्य सहरी क्षेत्रमा झन् बाक्लो रुपमा देखिएको छ । तिहारका लागि किनमेल गर्न पुग्नेहरुको भिडभाड सुनसरीको मुख्य चोक देखि, मुख्य बजार क्षेत्रमा देखिन्छ ।
तिहार हिन्दू धर्मावलम्बीहरुको दसैँपछिको सबैभन्दा ठूलो पर्व हो । यो पर्व कार्त्तिक कृष्ण पक्ष त्रयोदशीका दिन काग तिहारको नामले शुरु भएर शुक्ल पक्षको द्वितीया तिथिको भाइटीकासम्म (पाँच दिन) मनाइन्छ । पाँच दिनसम्म मनाइने भएकाले यसलाई यमपञ्चक पनि भनिन्छ ।
तिहार नजिकिएसँगै देशभर किनमेलका लागि नजिकको बजार जाने मानिसहरुका कारण स्थानीय हाटबजारहरु व्यस्त बन्न थालेका छन् । सुनसरीको मुख्य बजार क्षेत्रपनि यतीबेला मखमलि माला, माटोको दियो, भाइ मसला, रंगोलि लगायतका तिहारका सामानले भरिभराउ बनेको छ ।
कोही बजारमा ६० रुपैयाँ ६० रुपैयाँ भन्दै कराइरहेको सयपत्री माला किन्नमा व्यस्त छन् त कोहि सप्तरंगि टीका किन्न। यसवर्ष सामान्यभन्दा धेरै वर्षा भएका कारण पनि फूलखेती राम्रोसँग फष्टाउन नसकेको फूल माला व्यवसायी सिता चौधरी बताउँछिन् ।
यता झिलिमिलि बत्तिमा भने बर्सेनि मूल्य वृद्ध भइरहेकोले सोचे अनुरुपको व्यापार नभएको अर्का व्यवसायी रवि चौधरी बताउँछन् ।
विश्व बजारमा नै महङ्गि बढेकोले पनि होला झिलिमिलि बत्तिको मूल्य विगतका वर्षहरुमा भन्दा केही बढेको भए पनि व्यापार नभएको व्यापारी राम मेहता बताउँछन् ।
गत वर्षको तिहारमा १५ कारोड २० लाख ७५ हजार रुपैयाँभन्दा बढीको फूलको कारोबार भएको थियो ।
काराेबार भएकामध्ये सबैभन्दा बढी सयपत्री फूल १२ करोड ७० लाख ५० हजार, मखमली एक करोड ६७ लाख ७५ हजार, गोदावरी ५२ लाख ५० हजार र ३० लाख रुपैयाँको मखमली विभिन्न देशमा निर्यात भएको थियो। नेपाली बजारमा यो वर्ष फूलको उत्पादन कम देखिएको कारणले पनि विगतको भन्दा बढी फूल आयत भएको देखिन्छ ।
