सुनसरी । पूर्वी तराईमा बसोवास गर्ने थारु समुदायले हरेक वर्ष भाद्र महिनाभरी रैब पर्व धुमधामले मनाउँछन् । भदौको पहिलो आइतबारबाट सुरु भई महिनाभरी पर्ने आइतबारका दिन रैब पर्वका रुपमा मनाउने गरिन्छ । यो पर्वलाई गुलियो (मिठ पावैन)पनि भन्ने चलन रहेको छ । यस दिन थारु समुदायको घरघरमा दही, दूध, चिउरा, चिनी, जेरी, फलफुल आदि खाने गरिन्छ । अर्थात गुलियो खानेकुरा मात्रै खाने गरिन्छ, थारु भाषामा आइतबारलाई रैबू पनि भनिन्छ ।
थारु समुदायको नियम र संस्कार अनुसार प्रत्येक घरमा यस दिन नुन, तेल खाए र अन्य नुनिलो चिज खाए पर्व भंग हुने र कुलदेवता रिसाउने मान्यता पनि रहिआएको छ । गाउँ भरीका थारु महिलाहरु जम्मा भई प्रत्येक घरघरमा गई डाली दक्षिणासहित चामल फलफुल संकलन गर्ने गर्दछन् । रैव पर्वको भोली पल्ट नजिकको तलाउ, नदी र पोखरीमा गएर ूबिसहैर माताू र नाग नागिन देवताको पुजा गरि पर्वलाई विर्सजन गर्ने गरिन्छ ।
यसैगरी धार्मिक मान्यता अनुसार छोरी चेली लाई माइत बोलाएर सुख दुखका कुराहरू साटासाट गर्नाले छोरी चेलीको आशिष लाग्ने र आफुले चिताएको सबै आशा आकांक्षा पुरा हुनुको साथै परिवारमा शान्ति, बालबच्चाको सुस्वास्थ्यको कामना गर्नुको साथै कृषिउपजमा वृद्धिको लागि समयमा वर्षा होस्, बालीनालीमा रोगव्याधी नलागोस् भन्ने कामना गर्दै यो पर्व मनाइने चलन रही आएको शिक्षक तथा थारु विश्लेषक छविलाल चौधरीले जानकारी दिएका छन् ।
यो पर्व अहिलेसम्म पनि थारु समुदायमा निरन्तर मनाई रहेकाले भावी सन्ततिले समेत महत्व र संरक्षण गर्न आवश्यक रहेको विश्लेषक चौधरीले बताए । रैब पर्व पूर्वी तराईका सुनसरी, झापा, मोरङ, सप्तरी, सिरहा, उदयपुर र धनुषा लगायत थारु बसोवास रहेको जिल्लाहरुमा मनाउने गरिन्छ । यस्तै पश्चिमका थारुहरुले यो पर्वलाई “बड्का अटवारी” भनेर मनाउने गर्छन् । उनीहरु यो पर्व कृष्णा जन्माष्टमीपछि मनाउने गर्दछन् ।
