बराहक्षेत्र । बराहक्षेत्र नगरपालिका वडा नम्बर ३ महेन्द्र माविको खेलमैदान न्यु जेनेरेसन क्लबद्वारा जारी दोस्रो न्यु जेनेरेसन च्यालेन्ज कप २०७७ फुटबल प्रतियोगितामा शान्तिनगर फुटबल क्लब इटहरी फाइनलमा प्रवेश गरेको छ ।
बिहीबार पञ्चायन फुटबल क्लब रामधुनी र शान्तिनगर फुटबल क्लब इटहरी बीच भएको अन्तिम सेमिफाइनल खेलमा पञ्चायन क्लबलाई २ विरुद्ध ४ गोलले पाखा लगाउँदै शान्तिनगरले फाइनलका लागि आफ्नो सिट सुरक्षित बनाएको हो ।
शान्तिनगरका शेखर लिम्बूले खेलको पहिलो हाफको १७औं मिनेटमा गोल गर्दै पहिलो खाता खोलेका थिए । खेलको २५ औं मिनेटमा पञ्चायनका तिर्थ बस्नेतले गोल गर्दै खेल बराबर बनाएका थिए ।
पहिलो हाफसम्म १(१ गोलमा सिमित खेलको दोस्रो हाफमा शान्तिनगरका शेखर लिम्बुले ५औं मिनेटमा गोल गर्दै खेललाई अग्रता दिलाएका थिए । पुनः शान्तिनगरका बिशाल पाण्डेले खेलको छैठौं मिनेटमा गोल गर्न सफल भएका थिए । शान्तिनगर फुटबल क्लबका क्याप्टेन समेत रहेका सुसन लामाले दोस्रो हाफको १९ औं मिनेटमा गोल गर्दै खेललाई अग्रता दिएका थिए भने २७ औं मिनेटमा पञ्चायनका तिर्थ बस्नेतले थप गोल गर्दै खेलमा २ गोल बनाए ।
२ विरुद्ध ४ गोलअन्तरले विजयी बन्दै शान्तिनगर फुटबल क्लब इटहरी फाइनला प्रवेश गरेको हो । शान्तिनगरले अब आइतबार आयोजक क्लबसँग उपाधिका लागि भिड्ने छ । बिहीबारको खेलमा शान्तिनगरका शेखर लिम्बु म्यान अफ द म्याच घोषित भए । उनले एक हजार १ सय रुपैयाँ प्राप्त समेत गरे ।
शनिबार हुने भनिएको फाइनल खेल विभिन्न कारणले गर्दा सो दिन नभइ आइतबार १६ गते हुने आयोजक क्लबका अध्यक्ष अजित राजधामीले जानकारी दिए । आइतबार ए डिभिजन क्लबका खेलाडीले भरिएको आयोजक रातो र शान्तिनगर फुटबल क्लब इटहरी बीचहुने राजधामिले बताए ।
बराहक्षेत्र नगरपालिकाको कार्यालय संरक्षकको रुपमा रहेको च्यालेन्ज कपलाई वडा नम्बर ३ को कार्यालयले प्रायोजन गरेको छ । प्रतियोगितामा बिजेताले ५१ हजार १ सय ११ रुपैयाँ, ट्रफी र प्रमाणपत्र प्राप्त गर्नेछन् भने उपबिजेताले ट्रफी, प्रमाणपत्रसँगै ३१ हजार १ सय ११ रुपैया प्राप्त गर्ने आयोजक क्लबका अध्यक्ष राजधामीले जानकारी दिए ।
