बराहक्षेत्र । हाल कृषि पेशा मध्ये कुखुरापालन पनि एक प्रमुख मानिन्छ । कृषकहरुमा यसको दिन प्रतिदिन आकषर्ण बढ्दै गइरहेको बेला बराहक्षेत्र नगरपालिकामा पनि यस पेशामा उल्लेखनीय कृषकहरूले व्यवसायिक रूपमा लगानी बढाइरहेका छन् ।
बराहक्षेत्रका कृषक (ब्राेइलर) कुखुरा पालनमा आकर्षित हुन थालेका छन् । हाल बराहक्षेत्र नगरभित्र २० वटा कुखुरा फार्म दर्ता भई संचालनमा रहेको छन् । जसमध्ये चतरामा ४, कालाबन्जरमा ४, चक्रघट्टीमा २, बाङ्गेमा २ र अन्य ठाउँमा ८ र्फा सञ्चालित छन् ।
यी २० वटा फार्मले बराहक्षेत्र नगरपालिकामा कुखुराको मासुको औषत माग मात्र पुर्ती गर्न सकिरहेको छ । नगरपालिकामा अझै पनि फामहरु सञ्चालनमा ल्याउन सके वा हाल सञ्चालनमा रहेका फाममा कुखुराको संख्या बढाउन सके कुखुरा बिक्रीबाट आम्दानी गर्नुका साथै मासुको खपत बढाउन सकिने कृषक राजेन्द्र भण्डारीको भनाइ छ ।
कुखुरापालनको सन्दर्भमा ठाँउ र लगानीको आधारमा उपयुक्त खोर निर्माण सकिने र जसका लागि खोर अनुसार लागानी लाग्ने कृषक प्रकाश भट्टराईले बताए । प्रत्येक एक सय कुखुरा पाल्नका लागि २५ देखि ३० हजार रुपैयाँ लगानी लाग्ने उनले जानकारी दिए । उनका अनुसार प्रत्येक १०० चल्लालाई ४५-५० दिन को अवधिमा ७ बोरा दाना चाहिन्छ । सुरु सुरुको अवस्थामा ५०० कुखुरा पाल्दै आएका
उनले हाल साढे चार हजार कुखुरा पालिरहेका छन् । जसबाट वार्षिक रुपमा ४,५ लाख खुद नाफा आउने उनले बताए ।
उनले करिब ४ वर्ष अगाडि ५ लाख रुपैयाँ लगानिमा सृजना पोल्ट्री फाम सुरु गरेका हुन् । कुखुराको सुलिबाट पनि राम्रो मल उत्पादन हुने उनको भनाइ छ ।
यश प्रकारको सम्भावना बोकेको यस कृषि पेशालाई युवाहरू समक्ष पुराउन यस नगरपालिकाले विभिन्न अनुदान कायक्रम ल्यायर तथा कुखुरा पालन सम्बन्धि तालीम ल्याउन युबाहरुलाई प्रोत्साहन दिनुपर्ने कृषकहरुको साझा भनाइ छ । यसबाट बराहक्षेत्र नगरमा मासुको माग समेत पूर्ति हुने र युवाहरूमा रोजगारी सृजना पनि हुने कृषक सुशिल घिमिरेले बताए ।
